Nodeems déi lescht Véierelsfinallen zu Paräis e Mëttwoch wéinst de Wiederkonditiounen ofgesot goufen, sinn dës en Donneschdeg gespillt ginn.

Bei den Hären ass et komm, wéi een et sech hätt kënnen denken. An der éischter Partie war den Alexander Zverev ouni Chance géint de Weltranglëschtenéischten Novak Djokovic, dee sech mat 7:5, 6:2 a 6:2 duerchsetze konnt. Och déi aner Véierelsfinall war relativ kloer an do war et den Dominic Thiem, dee mat 6:2, 6:4 a 6:2 géint de Karen Khachanov gewanne konnt.

Bei den Damme gouf et en Donneschdeg eng fauschtdéck Iwwerraschung. Do gouf nämlech d'Simona Halep, déi aktuell Nummer 3 vun der Welt a Gewënnerin vum leschte Joer kloer vum eréischt 17 Joer alen Amanda Anisimova eliminéiert, dat mat 6:2 a 6:4. An der zweeter Véierelsfinall konnt sech d'Australierin Ashleigh Barty mat 6:3 a 7:5 géint d'Madison Keys behaapten a sech esou fir hir éischt Halleffinall bei engem Grand Slam qualifizéieren.

Hären

D’Nummer 1 vun der Welt, den Novak Djokovic krut et en Donneschdeg an der Véierelsfinall vu Roland Garros mam Däitschen Alexander Zverev ze dinn. Den Djokovic, dee bis heihinner nach ouni Sazverloscht war, huet sech an der Ufanksphas vun der Partie immens schwéier gedoen. Den Zverev war gutt erakomm a konnt am 1. Saz beim Stand vu 4:4 ee Break realiséieren. Hien huet et awer verpasst, fir du bei eegenem Service de Saz ze gewannen. Den Djokovic konnt nämlech am Uschloss direkt zweemol breaken an de Saz mat 7:5 gewannen. Direkt zum Ufank vum zweete Saz konnt den Djokovic den Zverev nach emol breaken a war elo also ee Break vir. De Serb konnt de Rescht vum Saz iwwer säi Opschlag halen an esouguer nach ee Break maachen an de de Saz mat 6:2 gewannen. Am leschte Saz war et op en Neits relativ kloer, den Zverev wousst net, wat e maache sollt, fir de Serb a Bedrängnis ze bréngen, esou dass och dëse Saz mat 6:2 un den "Djoker" gaangen ass an esou och de Match an den Ticket fir d'Halleffinall.

An der leschter Véierelsfinall koum et zum Duell tëscht dem Dominic Thiem an dem Karen Khachanov. Den Thiem ass immens gutt an de Match erakomm a konnt den éischte Saz kloer mat 6:2 fir sech entscheeden. Am zweete Saz ass dunn awer och de Russ méi staark ginn an de Match war elo däitlech méi equilibréiert. Allerdéngs huet den Éisträicher beim Stand vu 4:4 nees seng Klass gewisen a sengem Géigner den Opschlag ofgeholl. Am Uschloss konnt hien den eegene Service duerchbréngen, fir och den zweete Saz ze gewannen, dat mat 6:4. Am 3. Saz hat de Khachanov dem Thiem dunn iwwerhaapt näischt méi entgéintzesetzen, esou dass dëse kloer mat 6:2 un den Éisträicher gaangen ass, deen domat souverän an der Ronn vun de leschte 4 steet.

Domat spillen an den Halleffinallen den Novak Djokovic an den Dominic Thiem géinteneen, fir eng Plaz an der Finall. an där aner Halleffinall kënnt et dann zum Gigantentreffen tëscht dem Roger Federer an dem Rafael Nadal.

Dammen

D'Halep konnt nëmmen an der Ufanksphas vum Match mat der jonker Amerikanerin mathalen, déi ee richteg héijen Niveau un Tennis gewisen huet. D'Rumänin, déi bei de French Open als grouss Favoritin gehandelt gouf, huet och richteg gutt gespillt, ma hat dem Anisimova en Donneschdeg nawell näischt entgéintzesetzen. Den éischte Saz war bis zum Stand vun 2:2 ganz serréiert, ma dono huet d'Anisimova ee Winner no deem anere geschloen, fir de Saz mat 6:2 ze gewannen.

Am 2. Saz ass et genau esou virugaangen an esou louch d'Amerikanerin séier mat 4:1 am Avantage. Do ass déi 17 Joer al Spillerin awer wuel e bëssen Nervös ginn an d'Halep konnt nach eemol zeréckkommen an op 4:4 ausgläichen. Do huet d'Anisimova sech awer nees gefaangen a konnt net nëmme mam Break op 5:4 stellen, mä esouguer bei eegenem Service de Sak zoumaachen a sech domat fir d'Halleffinall qualifizéieren.

An der zweeter Véierelsfinall stounge sech d'Madison Keys aus den USA an d'Ashleigh Barty aus Australien géigeniwwer. Hei war et déi 23 Joer jonk Australierin, déi de bessere start an de Match erwëscht hat an den éischte Saz och verdéngt mat 6:3 gewonnen hat. Den zweete Saz war e gutt Stéck méi enk, ma beim Stand vun 3:3 konnt d'Barty, no engem Réckhand-Feeler vum Keys, ee Break realiséieren, fir op 4:3 ze stellen. Beim Stand vu 5:4 hat d'Barty dunn d'Chance, fir de Match mam eegene Service ze decidéieren, mä d'Keys konnt d'Australierin breaken, fir op 5:5 ze stellen. Der Australierin ass awer direkt nees ee Rebreak gelongen an déi Kéier huet si et bei eegenem Service besser gemaach, fir d'Partie mat 6:3 a 7:5 ze gewannen.