E Samschdeg huet zu Langenfeld an Däitschland d'Weltmeeschterschaft am Sportkeelen ugefaangen.

Direkt um 1. Dag vun der Sportkeele-Weltmeeschterschaft konnt sech d'Lëtzebuerger Mixed-Ekipp d'Goldmedail sécheren.

De President vun der Sportsektioun Sacha André huet dat Resultat iwwerrascht.

AUDIO: Extrait Sacha André

Och bei deenen zwee Spiller Chris Fuchs a Mandy Parracho war d'Freed iwwert d'Goldmedail ganz grouss. Si konnten et kuerz no der Kompetitioun kaum gleewen, datt ee sech de Weltmeeschtertitel konnt sécheren.

AUDIO: Extrait Chris Fuchs
AUDIO: Extrait Mandy Parracho

Nom éischte vun am ganzen dräi Bléck konnte béid Lëtzebuerger Gilles Mores (867 Holz) a Mandy Parracho (874 Holz) sech eng kleng Avance vu 6 Holz géintiwwer der favoriséierten Däitschen erausspillen.

Am zweete konnten d'Doris Melo (769 Holz) an de Chris Fuchs (868 Holz) 1637 Holz dropleeën. Et war eng gutt Ausgankssituatioun, mee et huet ee missten ofwaarde wéi déi däitsch an déi brasilianesch Ekippe sech géifen aus der Affär zéien.

An et gouf, wéi erwaart, ganz spannend.

Déi brasilianesch Ekipp huet schonn an der Halschent vum Duerchgang misse lassloossen an d'A goufen op déi däitsch Koppel geriicht, déi net gutt gestart ass. Och am Laf vum Duerchgang hu si sech schwéier gedoen, d'Zuel vun de Roude Léiwen ofzefänken.

Um Enn konnt d'Ekipp mam Mandy Parracho, Doris Melo, Chris Fuchs a Gilles Mores sech an dëser neier Disziplin, déi fir d'éischt bei enger Weltmeeschterschaft gespillt gouf, d'Goldmedail sécheren.

D'Zuel vun 3.378 Holz ass och gläichzäiteg Weltrekord.

Vill Zäit fir ze feiere gëtt et awer net. E Samschdeg de Moien um 10 Auer fänkt d'Ekippekompetitioun un.

Déi ganz Kompetitioune ginn um Channel vum Weltverband WNBA-NBS gestreamt.

Télégramm vum Sportminister Dan Kersch

Télégramme de félicitations du Ministre des Sports Dan Kersch à l'équipe nationale luxembourgeoise des joueurs de quilles, championne du monde par équipe mixte.

---------------------------------------------------------------------------------------------------------------------

Championnats du monde de jeux de quilles à Langenthal en Allemagne:

Première compétition et premier titre pour le Luxembourg !

La première compétition lors des championnats du  monde de jeux de quilles à Langenfeld en Allemagne, l'épreuve par équipe mixte, s'est soldée par un premier titre pour le Luxembourg, et de sus un nouveau record du monde, voilà un début tonitruant pour les représentants luxembourgeois !

Bravo, et toutes mes félicitations, à Mandy Parracho, Doris Melo, Chris Fuchs et Gilles Mores pour cette performance mémorable qui ne manquera pas d'attiser les espérances et les ambitions pour les épreuves à venir dans le cadre de ce championnat du monde !

Mes meilleurs voeux vous accompagnent pour la suite des compétitions durant la semaine à venir !

Virschau op d'WM

Nodeems d'Lëtzebuerger Delegatioun op der leschter Weltmeeschterschaft virun 2 Joer zu Oberthal am Ganze 6 Medaile gewanne konnt (1x Gold, 3x Sëlwer an 2x Bronz), wëll een dëst Resultat dëst Joer confirméieren. 9 Natioune sinn dëst Joer mat dobäi.

Am Hären-Eenzel, wat gläichzäiteg Kinneksdisziplin ass, geet bei den Hären ënnert anerem de Gilles Mores un den Depart. „Mam Gilles Mores hu mer definitiv e Spiller vu Weltklass am Kader deem vill zouzetrauen ass. Mir hoffen dass hien et am Eenzel an d'Finall packt. Dass hien dat kann, huet hie bei der leschter Weltmeeschterschaft gewisen, wou hie Bronz gewanne konnt“, sou de President vun der Sportsektioun Sacha André. De Christopher Zels wäert d'Lëtzebuerger Faarwen als 2. Spiller am Hären-Eenzel vertrieden.

Den Dammen-Eenzel spillen d'Martine Keller an d'Mandy Parracho. D'Mandy Parracho stoung bei der leschter Weltmeeschterschaft an der Finall an huet Sëlwer gewonnen. Fir d'Martine Keller ass eng Bronzmedail erausgesprongen.

An der Ekippekompetitioun bei den Hären an den Dammen ass dat kloert Zil, wéinstens Sëlwer ze gewannen an och an deenen aneren Disziplinnen, déi eng oder aner Medail mat Heem ze bréngen.

"Eng Goldmedail kann een op deem héijen Niveau net als selbstverständlech ugesinn. D'Ziler si generell d'Participatiounen un de Finallen. Grad an der Mixte-Ekipp, der 1. Kompetitioun, wëlle mir direkt eng Medail gewannen, fir och moralesch e gudde Start ze hunn", esou de Sacha André weider.

Lëtzebuerg gëtt vertrueden duerch 6 Hären a 5 Dammen, déi vu béiden Traineren Jemp Schnorbus (Herren) an Alberto Bargagna (Dammen) nominéiert goufen.

Encadréiert gëtt d'Ekipp vum Chef d'équipe Andre Sacha a vum Sportchef Luigi Barruzzini.

Hei d'Ekippen am Detail:

Hären:
Mores Gilles
Molitor Patrick
Fuchs Chris
Neiertz Gilles
Zels Christopher
Hoffmann Tom

Dammen:
Keller Martine
Parracho Mandy
Lutty-ParrachoWendy
Parracho Stacy
Melo Doris