De fréiere President vun der Uefa, Michel Platini, gouf no engem stonnelaange Verhéier aus dem Garde à Vue entlooss.

Et geet méi konkret ëm d'Manéier wéi d'Futtball-WM 2022 am Katar vergi gouf. De Michel Platini konnt an der Nuecht op e Mëttwoch den Haaptquartier vun der Antikorruptiounspolice zu Nanterre verloossen.

Et wier laang gewiescht, sou de fréiere Futtballspiller. Dass hie festgeholl gi wier, hätt wéi gedoen, sou de Michel Platini. Säin Affekot huet vu vill Kaméidi ëm Näischt geschwat. De fréiere Kapitän vun der franséischer Nationalekipp hätt sech ongerecht an disproportionéiert behandelt gefillt. Et wier näischt un de Virwërf drun.

Wéi d'Noriichtenagence DPA e Mëttwoch aus Justizkreesser confirméiert krut, gouf kee Verfahre géint de Platini ofgemaach.

Hannergrond wieren Ermëttlunge wéinst der ëmstriddener Decisioun, fir d'Weltmeeschterschaft 2022 am Katar auszedroen. Am Joer 2010 war de Platini un dëser Decisioun bedeelegt. Wéi et heescht, hätt hie sech virun där Decisioun mam kataresche Vertrieder Mohamed Bin Hammam getraff.

De Platini war vun 2007 bis 2015 President vun der Europäescher Futtball-Unioun. Viru 4 Joer war hien du vun der Ethikkommissioun vun der Fifa suspendéiert ginn, 2016 ass hie selwer zeréckgetrueden.