Um Sonndeg stoungen zwou weider Aachtelsfinallen um Programm. England krut et mat Kamerun ze dinn a Frankräich huet géint Brasilien gespillt.

E Samschdeg scho konnte sech Däitschland an Norwegen fir d'Véierelsfinalle qualifizéieren. E Méindeg trëfft da Spuenien op d'USA a Schweden op Kanada an en Dënschdeg sinn déi lescht Aachtelsfinallen, wann Italien et mat China an Holland mat Japan ze di kritt.

England - Kamerun 3:0

D'Ladies aus England wollten näischt an dësem wichtege Match ubrenne loosse a konnte schonn no 14 Minutten duerch e Gol vum Houghton a Féierung goen. An der Nospillzäit vun der éischter Hallschent huet d'White dann nach op 2:0 erhéicht. De Schlusspunkt koum vum Greenwood no 58 Minutten. D'Auswiesselunge vu Kamerun hunn net vill um Resultat geännert. England war mat 64 Prozent Ballbesëtz quasi de ganze Match iwwer iwwerleeën.

Domadder trëfft England an der nächster Ronn op Norwegen.

Frankräich - Brasilien 2.1 (n.V.)

© AFP

No ronn 23 Minutten huet Frankräich gefeiert, ma d'Schiidsriichterin huet sech d'Zeen am Video nach emol ugekuckt an de Gol net ginn. Esou ass et mat engem 0:0 an d'Paus gaangen. Nom Säitewiessel trëfft d'Gauvin no 52 Minutten eng zweete Kéier an d'Netz an dëst d'Kéier ass de Gol och op der Tafel stoe bliwwen. Ma d'Freed war net vu laanger dauer. 12 Minutte méi spéit schéisst d'Thaisa fir Brasilien den Ausgläich. Et sollt an der regulärer Spillzäit kee Gol méi falen, esou datt weider 30 Minutten dropgeluecht goufen.

Kuerz nom Upëff vun der zweeter Hallschent vun der Verlängerung huet d'Kapitänin Henry Frankräich nees a Féierung bruecht, dat no engem Fräistouss. Dëse Gol sollt dann de Match entscheeden an d'Heemekipp eng Ronn weider bréngen.