Zu Jonglënster huet e Samschdeg d'Ekipp aus Russland d'Iwwerhand behal, déi mat villen Nationalspiller ugetrueden ass.

Mat Primorye Vladivostok géint Chambly-Oise gouf et déi erwaarte Finall tëscht dem Titelverdeedeger aus Russland an hirem jorelaangen Challenger aus Frankräich. Et gouf sech e spannend Duell bei den European Club Championships am Badminton erwaart, mä déi Erwaardunge konnten net erfëllt ginn.

VIDEO: Vladivostok wënnt d'European Club Championships am Badminton
Zu Jonglënster huet e Samschdeg d'Ekipp aus Russland d'Iwwerhand behal, déi mat villen Nationalspiller ugetrueden ass.

Bei Chambly huet de beschte Spiller Marcus Ellis gefeelt, dat well hien op engem Tournoi ënnerwee ass, wou et Punkte fir d’Qualifikatioun zu den Olympesche Spiller ze verdeele ginn an dat bei den European Club Championships net den Fall ass.

Schonn am éischte Match huet ee séier gesinn, datt d’Lat fir Chambly ouni Marcus Ellis ze héich louch. Den Eetu Heino hat sech bei enger onglécklecher Aktioun wéi gedoen an dat huet en nom éischten techneschen Timeout, wou hie schonn 3 Punkten zerécklouch, gemierkt. Den Ecart ass ëmmer méi grouss ginn an de Russ Vladimir Malkov huet dem Challenger beim 21-10 keng Chance gelooss.

Am zweete Saz huet de Fransous beim Score vun 3-8 missen opginn.

Am Badminton geet et jo drëm de Fiederball, Shuttle genannt, beim Géigner an d'Limitt vum Terrain ënnerzebréngen. No all Echange gëtt et e Punkt an de Spiller, deen de Punkt mécht, dierf de nächste Service maachen. Zwee Sätz musse gewonne ginn a pro Saz geet et bis 21 bei minimum 2 Punkten Ënnerscheed.

Nom Häreneenzel hunn d'Damme gespillt. Hei war déi russesch Vertriederin staark favoriséiert an huet dem Spill fréi säi Stempel opgedréckt. D’Soraya de Visch hat ze wéineg Iwwerraschungsmomenter op hirer Säit, fir dem Evgeniia Kosetskaya geféierlech ze ginn.

D’ Russin huet mat hirer Géignerin Kaz a Maus gespillt an dem Soraya de Visch beim 21-15 an 21-7 keng Chance gelooss.

Domat louch Vladivostok schonn 2-0 a Féierung an et war un den Doublematcher.

Als éischt war et um Härendouble an hei gouf de Leit am Centre Gaston Stein richteg spektakuläre Sport gewisen. Bei Chambly stoung ëmmerhin déi fréier Nummer 1 op der Welt, Robert Mateusiak, um Terrain. Ma d’Russe Vladimir Ivanov an Ivan Sozonov hu vill vun hirer Gréisst profitéiert an dacks de méi schwaache Spiller bei de Fransousen, Bastian Kersaudy gesicht an zu Feeler gezwongen.

Mat 21-11 hunn Ivanov/Sozonov den éischte Saz um Enn kloer decidéiert an Vladivostok war der Goldmedaile schonn ganz no.

Am zweete Saz ware Kersaudy/Mateusiak am Ufank nach drun, ma hu mat der Zäit ëmmer méi Eegefeeler produzéiert, soudatt d'Russen och dësen kloer fir sech decidéiere konnten.

Eng verdéngt 3-0 Victoire also fir Vladivostok, déi domat hiren Titel verdeedege konnten.

No der Ouvertureszeremonie den Méindeg sinn d'European Club Championships elo also eriwwer. Eng Mammutorganisatioun, déi zum gréissten Deel vum Badminton Club Jonglënster gestemmt gouf. Den Bilan fält duerchaus positiv aus, dat och well den Organisateur op eng familiär Atmosphär gesat huet.

Eng gelongen éischt Editioun also mat enger flotter Reklamm fir de Badminton an d’Gemeng Jonglënster als Ausriichter vun engem europäeschen Top-Event, bei deem all d’Intervenanten mat zefriddene Gesiichter den Ofschloss gefeiert hunn.

© RTL Télé Lëtzebuerg (Screenshot)