De Futtball- a Rugbystadion op der Kockelscheier wäert bal 80 Milliounen Euro kaschten.

E Méindeg huet de Stater Gemengerot fir en Depassement vum Budget vu ronn 18 Milliounen gestëmmt – allerdéngs mat véier Enthalungen.

De Schäfferot huet erkläert, datt en Deel vun de Käschten entstane wieren, well eng Surface "Multi" soll dobäikommen, well Infrastrukture fir e 5G-Reseau solle virgesi ginn, well d’Police e Video-Iwwerwaachungssystem wëll, a well d’UEFA spezifesch Ufuerderungen hätt.

Dee gréissten Deel, 11,3 Milliounen Euro, wier awer op Feeler vum Bureau d’études zréckzeféieren.

AUDIO: Suivi Stadion - De Reportage vum Fanny Kinsch

"Si hu manifestement Präisser ënnerschat!", seet d’DP-Schäffe Simone Beissel.

"Si" dat ass d’Planungsgemeinschaft Nationalstadion in Luxemburg PGNL. De Schäfferot huet nämlech präziséiert, datt Paul Wurth Geprolux, déi zoustänneg si fir d’Koordinatioun vum Projet, grad esou wéi d’Servicer vun der Stad, dem PGNL vertraut huet an net fir d’Feeler verantwortlech wier.

De PGNL setzt sech zesummen aus groussen däitschen a lëtzebuergeschen Architekten- an Ingenieursbüroen. Dës sollen elo zur Verantwortung gezu ginn, sot um Méindeg de CSV-Schäffe Laurent Mosar. Senger Meenung no mussen d'Clauses pénales hei spillen.

Wann dat déi bescht europawäit sinn, kënne mer frou sinn, datt mer net déi zweetbescht geholl hunn, sot zu de Feeler den Oppositioun-Conseiller vun déi Lénk David Wagner:

"Wann ech am Bericht liesen, datt de PGNL schreift: A priori le groupement voit ces omissions, mauvaises estimations, erreurs etc ... de façon moins négatives que la ville. ... Wow! Jo! Natierlech!"

Och den LSAP-Conseiller Tom Krieps huet sech iwwert d’Feeler vun der Planungsgemeinschaft gewonnert – de Schäfferot hätt de Gemengerot awer och méi missen um Courant halen, esou dass een och hätt kënne soen: "Nee, mir wëllen de 5G net, oder déi Beliichtung".

"Mir sinn nach net fäerdeg domat", esou den Tom Krieps nach.