Den Owend kritt den däitsche Champion FC Bayern München et mat Hertha BSC ze dinn. De Match fänkt um 20.30 Auer un.

E Samschdeg sinn dann zwee Lëtzebuerger am Asaz: de Laurent Jans mat Paderborn, déi an déi éischt Bundesliga opgestige sinn an de Leandro Bareiro mat Mainz. Paderborn ass e Samschdeg de Mëtteg fir den éischte Spilldag bei Leverkusen op Besuch a Mainz muss op Freiburg.

Et kann ee sech eng spannend Saison erwaarden, wou et op en Neits dierft spannend ginn an der Course ëm den Titel. Borussia Dortmund huet säi Kader an der Breet verstäerkt a wëll dëst Joer nees voll attackéieren. De BVB huet jo schonns am DFL-Supercup gewisen, dass een dem Rekordchampion d'Waasser reeche kann a si esouguer klappe kann.

Hannendru lauere Bayer Leverkusen an RB Leipzig, déi sech sécherlech och Chancen ausrechnen, fir vir matzespillen. Och Mönchengladbach, Hoffenheim, Schalke, Wolfsburg, Frankfurt, Bremen an d'Hertha dierften duerchaus Ambitiounen hunn, ëm d'europäesch Plaze matzespillen.

Fir déi aner Ekippen dierft et gréisstendeels drëms goen, d'Klass ze halen. Schwiereg dierften et hei d'Opsteiger Union Berlin, Paderborn a Köln kréien, ma och Mainz, Augsburg a Freiburg wäert wuel eng schwiereg Saison viru sech hunn.

De kompletten éischte Spilldag am Iwwerbléck:

Freideg um 20.30 Auer

FC Bayern München - Hertha BSC

Samschdeg um 15.30 Auer

Borussia Dortmund - FC Augsburg

Bayer Leverkusen - SC Paderborn

VfL Wolfsburg - 1. FC Köln

SV Werder Bremen - Fortuna Düsseldorf

SC Freiburg - FSV Mainz

Samschdeg um 18.30 Auer

Borussia Mönchengladbach - FC Schalke 04

Sonndeg um 15.30 Auer

Eintracht Frankfurt - TSG Hoffenheim

Sonndeg um 18 Auer

Union Berlin - RB Leipzig