Um Mëttwoch den Owend respektiv um Donneschdeg de Moien goufen déi lescht Véierelsfinalle gespillt.

D'Schwäizerin Belinda Bencic huet sech e Mëttwoch den Owend mat 7:6 a 6:3 géint d'Donna Vekic aus Kroatien duerchgesat. Domat steet déi 22 Joer al Spillerin, déi am 1. Tour d'Mandy Minella eliminéiert huet, fir déi éischte Kéier an hirer nach jonker Karriär an der Halleffinall vun engem Grand Slam. Duerch dës Victoire ass dann och schonns kloer, dass si de Sprong an d'Top 10 vun der Weltranglëscht packt.

Hei trëfft si op d'Kanadierin Bianca Andreescu, déi no hirer Victoire elo an der Weltranglëscht kuerz virun den Top Ten steet. Zejoert war et nach Plaz 152. Déi 19-Joer-al Spillerin huet sech an dräi Sätz géint d'Elise Mertens aus der Belsch kënnen duerchsetzen. An der anerer Halleffinall bei den Dammen trëfft d'Elina Svitolina op d'Serena Williams.

Och bei den Häre stoung da schonn um Mëttwoch den Owend eng Halleffinall Fest. Hei kritt et de Medvedev, deen de Wawrinka eliminéiere konnt, mam Dimitrov ze dinn, deen de Roger Federer erausgehäit hat, ze dinn.

Den Italiener Matteo Berrettini hat dann de besseren Dag géint de Gaël Monfils erwëscht. Hei konnt sech a 5 Sätz (3:6, 6:3, 6:2, 3:6 a 7:6) behaapten. Hien trëfft op de Rafael Nadal, deen um Donneschdeg de Moien eiser Zäit kuerze Prozess (6:4, 7:5 a 6:2) mam Diego Schwartzman gemaach huet.