Am Kader vun der Europa League spillt den F91 Diddeleng en Donneschdeg auswäerts géint den FC Sevilla. E Mëttwoch hu se sech op de Wee gemaach.

Per Charter goung et Richtung Sevilla. Am Gepäck waren och eng 50 Supporter, déi den F91 Diddeleng am Estadio Ramon Sanchez Pizjuan uféiere wäerten. Am Ganze ginn 100 Lëtzebuerger Spectateuren erwaart, déi sech schonn e puer Deeg virdrun op de Wee an Andalusien gemaach hunn.

D'Ekipp vum Bertrand Crasson trëfft um 3. Spilldag vun der Europa-League-Campagne op den FC Sevilla a wann een de Kader am Detail analyséiert, erkennt een, dass eng enorm Qualitéit am Kader stécht.

Ee vun hire beschte Spiller an der Europa League ass de Javier Hernández, och nach bekannt ënnert dem Numm „Chicharito“. Den Ex-Bundesligaspiller huet am spuenesche Championnat éischter d'Roll vum Joker, mä an der Europa League sammelt hie seng Minutten a beweist do seng Golgetter-Qualitéiten. 2 Goler aus 2 Matcher loosse sech weisen.

An der Europa League huet de Julen Lopetegui allerdéngs nach net déi bescht Ekipp opgestallt. Par Rapport zum spuenesche Championnat stoung nämlech op der europäescher Bühn nach kee Luuk de Jong, Jesús Navas oder Lucas Ocampos, fir nëmme Vereenzelter ze nennen, um Terrain.

Den Tom Schnell iwwer de Géigner
Den Diddelenger ass der Meenung, dass wéinst de Blessuren elo aner Leit sech beweise mussen.

Den FC Sevilla ass momentan souveränen Tabelleleader mat 6 Punkten am Grupp A a wann een e bëssen zeréckkuckt, d'Europa League läit de Spuenier. Am Ganzen hu si d'Europa League, respektiv den Uefa-Cup, scho 5 Mol gewonnen, dovunner konnt d'Ekipp aus Andalusien 3 Mol (13/14, 15/16, 16/17) hannereneen d'Coupe an d'Luucht strecken.

Aus der Siicht vum F91 Diddeleng muss de Bertrand Crasson op de Mario Pokar (blesséiert) an op den Mickael Garos (gespaart a blesséiert) verzichten, déi de schéinste Match vun der Saison verpasse wäerten.

Den Tom Schnell iwwer de Kader
...

Den FC Sevilla ass no 2 Spilldeeg mat dem Maximum vu 6 Punkten un der Tabellespëtzt am Grupp A vun der Europa League. Hannendru kommen Qarabag an den F91 Diddeleng mat 3 Punkten, dat virun APOEL Nikosia mat 0 Punkten.

De Match tëscht Sevilla an Diddeleng gëtt en Donneschdeg um 21 Auer gespillt a Live um 2ten RTL an op RTL.lu iwwerdroen.