De Marvin Martins muss mat Karpaty Lwiw eng Defaite astiechen, den Olivier Thill wënnt mat Ufa, déi soumat 3 Punkten afueren.

Um Sonndeg koum den FC Ingolstadt mat sengem Trainer Jeff Saibene géint den SV Meppen net iwwert een 1:1-Remis eraus. De Kutschke hat d'Ekipp vum Lëtzebuerger Trainer an der 6. Minutt a Féierung bruecht, ma an der Nospillzäit war dem Undav nach den Ausgläich gelongen.

An Zypern an der der First Division hat Apollon Limassol, bei deenen de Vahid Selimovic an der 46. Minutt agewiesselt gouf, beim 4:1 géint Nea Salamis keng Méi.

Bei der 0:3-Néierlag vun de Young Boys Bern géint den FC Basel an der 1. Divisioun an der Schwäiz stoung de Christopher Martins déi 90 Minutten um Terrain.

De Gerson Rodrigues soutz bei der 3:1-Victoire vun Dynamo Kiew géint Olimpik Donezk 90 Minutten op der Bänk a koum net zum Asaz.

Samschdeg

Bei der 0:1-Victoire vum FK Ufa géint Krylija Samara an der héchster russescher Liga war den Olivier Thill vun Ufank un dobäi. De Lëtzebuerger gouf an der 54. Spillminutt ausgewiesselt.

Een net esou erfollegräichen Nomëtteg hat iwwerdeems de Marvin Martins mat Karpaty Lwiw. An der ukrainescher Liga war de Lëtzebuerger bei der 0:2-Defaite an der Starteelef, krut an der 56. Minutt déi giel Kaart gewisen an ass an der 75. Spillminutt ausgewiesselt ginn.

Mat engem 3:1-Erfolleg zu Münster kommt sech Waldhof Mannheim mam Maurice Deville géint een Ofstigskandidat aus der 3. Liga behaapten. Dobäi hat et no den éischte 45 Minutten nach net gutt fir Mannheim ausgesinn, d'Heemekipp vu Preußen Münter louch nämlech 1:0 a Féierung. An der 2. Hallschecht konnt Waldhof awer eng Schëpp dropleeën a mat 3:1 wannen. De Lëtzebuerger Nationalspiller ass iwwerdeems an der 57. Minutt ausgewiesselt ginn.

De Laurent Jans stoung iwwerdeems mat Paderborn an der Starteelef géint RB Leipzig. De Kapitän vun der Lëtzebuerger Nationalekipp huet den 1:3 fir seng Ekipp virbereet an ass an der 84. Spillminutt ausgewiesselt ginn.

Royal Excelsior Virton, de Veräin vum Lëtzebuerger Geschäftsmann Flavio Becca, war géint KVC Westerlo am Asaz. Beim 1:1-Gläichspill stoungen den Anthony Moris, Kevin Malget an Dave Turpel vun Ufank un um Terrain. An der 2. Hallschecht ass den Aurélien Joachim fir den Dave Turpel erakomm. Domat stoungen alle 4 Lëtzebuerger Nationalspiller fir déi belsch Ekipp am Asaz.

Freideg

An der 2. däitscher Bundesliga huet de Karlsruher SC e Freideg den Owend mat 4:1 géint Jahn Regensburg gewonnen. De Lëtzebuerger Dirk Carlson souz bei der Lokalekipp déi 90 Minutten iwwer op der Bänk.

An der Ligue 2 a Frankräich bleift Orléans, d'Ekipp vum Vincent Thill, op der leschter Plaz an der Tabell. E Freideg den Owend huet een auswäerts géint Auxerre 2:2 gläichgespillt. De Lëtzebuerger Nationalspiller souz de komplette Match op der Bänk.

An der 2. Divisioun an Holland huet Maastricht mam Enes Mahmutovic zu Breda mat 0:2 de Kierzere gezunn. Den FLF-Spiller stoung an der Startformatioun, huet de Match duerchgespillt a krut an der 29. Minutt déi Giel Kaart gewisen.