Déi lescht Deeg ware 6 Schwëmmer aus dem Grand-Duché bei der Europameeschterschaft am klenge Baseng zu Glasgow a Schottland am Asaz.

Um leschten Dag ass d'Monique Olivier am 25 Meter Baseng nach eng Kéier en neie Lëtzebuerger Rekord iwwer 400 Meter Crawl geschwommen. Déi 21 Joer al Schwëmmerin schléit no 4 Minutten 11 Sekonnen an 5 Honnertstel un, a bleift domat 91 Honnertstel ënnert hirem 5 Joer ale Rekord. Um Enn war et déi 25. Plaz ënner 43 Konkurrentinnen.

Da gouf et och nach eng Kéier en neie Lëtzebuerger Rekord fir d'4x50 Meter „4 Nages“ Staffel, mat Fabiani, Stacchiotti, Henx a Mannes, mat engem Chrono vun 1 Minutt 37 Sekonnen an 34 Honnertstel. Déi 4 hunn deen ale Rekord aus dem November ëm 7 Sekonnen an 71 Honnertstel verbessert.

FLNS zitt positive Bilan

D'Lëtzebuerger Schwammfederatioun war déi lescht Deeg mat 6 Schwëmmer bei der Europameeschterschaft am klenge Baseng zu Glasgow vertrueden. Um Enn gouf et eng Rei perséinlech Beschtzäiten a 7 nei Lëtzebuerger Rekorder goufen opgestallt.

Bilan Schwamm-EM / Reportage Fränz Schneiders