No der 5. Etapp bleiwen d'Therese Johaug an den Alexander Bolschunow d'Leaderen am General vun der Tour de Ski.

Déi nächst Deeg gëtt zu Val di Fiemme an Italien d'Gewënnerin an de Gewënner vun der Tour de Ski 2019/2020 gesicht.

Um Freideg stoung bei den Dammen ee Massesprint am klassesche Stil iwwer 10 Kilometer um Programm. No 29 Minutten a 7 Honnertstel konnt sech d'Astrid Jacobsen d'Victoire sécheren. D'Norwegerin huet sech ganz knapps virun der Schwedin Ebba Andersson an dem Katharina Henning aus Däitschland duerchgesat. Fir d'Henning ass et am Weltcup déi éischt Placéierung an engem Eenzel um Podium.

No der 5. Etapp bleift d'Therese Johaug a Féierung. D'Norwegerin, déi e Freideg déi 4. gouf, huet virun de leschten 2 Etappen e Virsprong vun 19 Sekonnen op hir Landsfra Ingvild Flugstad Östberg. Op der drëtter Plaz läit aktuell d'Russin Natalia Neprjajewa. Si huet e Retard vun 32 Sekonnen.

Bei den Häre war e Freideg de Johannes Hoesflot Klaebo de Beschten. Den Norweger huet sech iwwer 15 Kilometer an enger Zäit vun 39 Minutten an 51 Sekonnen duerchgesat. Mat engem Réckstand vu 7 Honnertstel ass de Russ Sergej Ustjugow deen Zweete ginn. Um Podium stoung nach de Russ Alexander Bolschunow mat engem Retard vun 1 Sekonn.

Am General bleift de Bolschunow a Féierung, dat mat engem Virsprong vun 18 Sekonnen op de Klaebo an 21 Sekonnen op den Ustjugow.