Lazio Roum kann de Réckstand op Juventus Turin verkierzen. Iwwerdeems huet de Rheinderby Gladbach géint Köln missen ofgesot ginn.

Bundesliga

Bayern München - RB Leipzig 0:0

Am Spëtzematch vun der 1. däitscher Bundesliga hunn d'Spectateuren an der 1. Hallschent net all ze vill erlieft. Bayern hat wuel méi Ballbesëtz a méi Golchancen, ouni awer wierklech richteg geféierlech ze ginn. No der Paus hat de Sabitzer an der 46. Minutt direkt eng grouss Chance op den 1:0, ma huet de Ball iwwert de Gol geschoss. Leipzig huet vill méi investéiert wéi nach virun der Paus, an hat duerch de Werner 2 weider gutt Chancen. Bei de Bayern huet den Hernandez an der 67. Minutt säi Comeback ginn. Béid Ekippen hate gutt Chancen, fir den entscheedende Gol ze markéieren, ma Sabitzer a Goretzka kruten de Ball net hannert d'Linn. Um Enn trenne sech béid Ekippe mat 0:0. Bayern bleift an der Tabell domat weider 1 Punkt viru Leipzig.

Borussia Mönchengladbach - FC Köln

De Rheinderby gouf wéinst dem Stuermdéif "Sabine" ofgesot. D'Organisateure konnten de Spectateuren eng sécher Ofrees vum Match net garantéieren. Wéini de Match nogeholl gëtt, steet nach net fest.

Premier League

Manchester City - West Ham United

Och dëse Match gouf Opfer vum Wieder a gouf ofgesot.

Serie A

SSC Neapel - US Lecce 2:3
0:1 Lapadula (29'), 1:1 Milik (48'), 1:2 Lapadula (61'), 1:3 Mancosu (82'), 2:3 Callejon (90')

Neapel huet wuel éischter iwwerraschend doheem mat 2:3 géint Lecce de Kierzere gezunn, hat d'Lokalekipp an deene leschte Wochen dach erëm besser an den Tratt fonnt. D'Ekipp vum Gennaro Gattuso bleift domat weiderhin am Mëttelfeld vun der Serie A hänken.

Parma Calcio - Lazio Roum 0:1
0:1 Caicedo (41')

Lazio Roum huet eng weider Kéier hir gutt Form ënner Beweis gestëllt, a gewënnt dëse Match mat 1:0 duerch e Gol vum Caicedo an der 41. Minutt. Lazio Roum huet duerch d'Néierlag vu Juventus de Réckstand op den Tabelleleader domat op 1 Punkt verkierze kënnen.

Ligue 1

Racing Stroossbuerg - Stade Reims 3:0
1:0 Djiku (50'), 2:0 Majeed (82'), 3:0 Lala (90+3')

La Liga

CA Osasuna - Real Madrid 1:4
1:0 Garcia (14'), 1:1 Isco (33'), 1:2 Ramos (38'), 1:3 Vazquez (84'), 1:4 Jovic (90+2')

D'Lokalekipp huet Madrid um Ufank iwwerrascht, andeems si mat vill Drock attackéiert hunn. Osasuna huet sech esou an der 14. Minutt duerch de Garcia fir eng gutt Ufanksphas belount. Ma den Iscco an de Ramos hu banne 5 Minutten nach virun der Hallschent de Match gedréint. An de Schlussminutten huet Real de Match dunn duerch 2 weider Goler entscheet.