E Samschdeg den Owend haten d'Beefort Knights d'Ekipp vu Charleroi op Besuch. Um Enn gouf et eng batter 2:3-Néierlag.

Op der Äispist zu Beefort ass ëmmer eng méi lass, wann d'Knights e Match spillen. Esou och um Samschdeg den Owend wéi Charleroi op Besuch war. D’Ekipp aus dem Mëllerdall spillt aktuell am Belsche Championnat a mécht vill fir hire Sport iwwer déi sozial Medien ze promovéieren. Leider gouf et um Samschdeg e bësse manner ze feieren.

D’Beefort Knights sti momentan am belsche Championnat op der 7. Plaz an hu 4 Matcher gewonnen, 3 gläichgespillt an der 3 verluer. Am Ufank vun der Partie hat et nach gutt fir d'Knights ausgesinn, déi e gudde Start haten, ma de Keeper vu Charleroi sollt op dësem Spilldag bal all Puk halen, deen op säi Gol komm ass.

D'Gäscht aus der Belsch koumen ëmmer besser an de Match. An dräi Minutte konnte si zwee Mol markéieren. D'Lokalekipp konnt den Ecart net méi verkierzen an esou goung den éischten Drëttel mat 2:0 u Charleroi.

Am zweeten Drëttel koumen d'Knights gutt aus de Kabinnen an nodeems de Benny Welter op 1:2 verkierze konnt, markéiert de Mirko Mosr, den Ausgläich. 2:2 stoung et virum leschten an entscheedenden Drëttel.

Leider sollt et aus der Siicht vun den Knights net fir eng Victoire duergoen. An der Mëtt vum drëtten Drëttel markéiert Charleroi den 3:2 an huet dës Victoire och iwwer d'Zäit bruecht. Verdanke kënne si dëse Succès och hirem Keeper, deen eng richteg gutt Performance ofgeruff huet.

Den nächste Match fir d'Beaufort Knights ass den nächste Samschdeg virun eegenem Publik géint Olympia Heist op den Berg. Keng einfach Aufgab, well d’Ekipp ass Tabellenéischten am Belsche Championnat.

Vun dësem Joer u ginn d'Matcher vun de Beaufort Knights alleguerten am Livestream op Youtube iwwerdroen. An de Pausen, déi zwee Mol 15 Minutten daueren, gi Reklammen oder Promovideon an de Stream agebaut, déi deels selwer produzéiert ginn.

Och d’Äispist gëtt renovéiert. Néi Vestiairë sinn am Gange, gebaut ze ginn, an och zousätzlech Tribüne sinn an Aussiicht.

Wann ee ronderëm d’Äispist geet, fënnt een och e Fanshop, wou ee Gadgeten ze kafe kritt, fir net nëmme mat de Stëmmbänner de Veräin ze ënnerstëtzen, mee och am richtegen Dress opzetrieden.