E Sonndeg de Mëtteg huet d'Ekipp vum Lëtzebuerger Trainer géint Viktoria Köln mat 0:1 de Kierzere gezunn.

De Lëtzebuerger Trainer Jeff Saibene krut fir de Kont vum 26. Spilldag an der 3. däitscher Liga mam FC Ingolstadt géint Viktoria Köln ze dinn. No enger 1. Hallschecht ouni Goler sinn d'Gäscht an der 2. mat 1:0 a Féierung gaangen a konnten dëse Virsprong bis zum Schluss halen.

E batteren Nomëtteg gouf et iwwerdeems och fir de Gerson Rodrigues. De Lëtzebuerger Nationalspiller stoung bei der 0:3-Defaite vu sengem Veräin Ankaragücü 84. Minutten um Terrain a konnt der Defaite géint Sivasspor an der 1. tierkescher Liga näischt entgéintsetzen.

Net vill besser ass et dem Olivier Thill ergaangen. Den Ex-Nidderkuerer gouf an der 1. russescher Liga beim Stand vun 0:2 aus der Siicht vu sengem Club FK Ufa géint Krasnodar an der 79. Minutt ausgewiesselt.

Eng Victoire gouf et iwwerdeems fir de Veräin vum Gerard Lopez an der Ligue 1. Lille konnt sech nämlech auswäerts zu Nantes behaapten.

E Sonndeg war och de Maxime Chanot an der MLS an den USA am Asaz. Den Optakt an d'Saison war fir de Lëtzebuerger Nationalspiller awer alles anescht wéi gutt. De Chanot huet nämlech direkt an der 3. Minutt déi Rout Kaart gewise kritt. Säi Veräin New York huet um Enn awer auswäerts mat 1:0 géint Columbus Crew gewonnen.

Samschdeg

An der 3. däitscher Bundesliga spillt Waldhof Mannheim mam Maurice Deville, dee 76 Minutten am Asaz war, 1:1 géint den 1. FC Kaiserslautern gläich a steet elo op der 3. Plaz an der Tabell.

An der Ukrain waren den Tim Hall an de Marvin Martins bei Karpaty Lwiw 90 Minutten am Asaz. Um Enn verléiert Karpaty Lwiw allerdéngs mat 1:2 géint Kolos Kovalivka.

An der däitscher Bundesliga gouf et een historeschen Dag. Mam Leandro Barreiro an dem Laurent Jans stoungen zwee Lëtzebuerger gläichzäiteg an engem Match zesummen um Terrain. Mainz huet sech um Enn géint Paderborn behaapt.

Freideg

An der 2. Bundesliga an Däitschland huet e Freideg den Owend de Karlsruher SC mat 0:1 géint Nürnberg de Kierzere gezunn. Den decisive Gol huet den Erras an der 74. Minutt geschoss. Bei Karlsruhe stoung den Dirk Carlson déi 90 Minutten iwwer um Terrain. De Veräin vum Lëtzebuerger Nationalspiller bleift no 24 Spilldeeg weider am Tabellekeller.

An der 2. Divisioun an Holland huet Maastricht mam Enes Mahmutovic 2:3 géint Den Bosch verluer. De Lëtzebuerger stoung déi 90 Minutten iwwer um Terrain. Fir Maastricht hat et laang no engem Punkt ausgesinn, ma an der 2. Minutt vun der Nospillzäit hunn d'Gäscht nach den decisiven 3:2 markéiert.

Keng Chance hat e Freideg den Owend dann och an der Ligue 2 a Frankräich Orléans mam Vincent Thill. D'Ekipp vum Lëtzebuerger huet mat 0:2 géint Troyes de Kierzere gezunn a bleift domadder weider ofgeschloen op der leschter Plaz an der Tabell. Den Thill huet de Match duerchgespillt.

An der 2. Divisioun an der Belsch ass et dogéint fir d'Lëtzebuerger besser gelaf. Virton huet sech mat 4:1 géint Oud-Heverlee Leuven duerchgesat. Den Aurélien Joachim gouf an der 60. Minutt agewiesselt an huet an der 77. Minutt an an der 1. Minutt vun der Nospillzäit nach 2 Goler fir seng Faarwe markéiert. Mam Anthony Moris stoung nach ee weidere Lëtzebuerger um Terrain. Den Dave Turpel huet missen nokucken. D'Ekipp vum Geschäftsmann Flavio Becca bleift duerch dës Victoire op der 2. Plaz an der Tabell. Da war och de Chris Philipps e Freideg den Owend mat Lommel am Asaz. D'Ekipp vum Lëtzebuerger, dee vun Ufank u gespillt huet, huet sech misse mat engem 0:0-Gläichspill géint Roeselare zefridde ginn. Trotz allem ka Lommel opootmen, bei enger Néierlag hätt ee missen an engem Relegatiounsspill untrieden, elo huet een et an d'Playoff 2 gepackt.