D'Outdoor-Sportinfrastrukturen däerfen domat nees genotzt ginn. D'Vestiairë mussen awer zou bleiwen.

Vun e Méindeg u sinn nees méi Sportaktivitéiten dobaussen erlaabt. Eng vun de Konditiounen ass, dass et kee Kierperkontakt däerf ginn. Donieft mussen och d'Vestiairen an d'Duschen op de Sportinfrastrukturen zou bleiwen.

D'Martine Hansen vun der CSV ass frou, dass de Premier dës Annonce gemaach huet:

"Wann een och kee Futtballmatch ka spillen, sou kann een awer Technik a Konditioun üben. Et ass villes machbar, wou eben d'Sécherheetsreegele kënnen agehale ginn. Also och do ass de "bleift auseneen" méiglech an dofir ass et gutt, dass mir dat dote maachen. Et wier definitiv fatal, wa mir an dëser sanitärer Kris net géife kucken, dass d'Leit d'Méiglechkeet net géife kréien, fir no hirer Gesondheet ze kucken. De Sport gehéiert zu der Gesondheet dobäi." Den Donneschdeg de Moie war d'Chamberkommissioun Sport beieneen. D'Chantal Gary vun Déi Gréng wollt do vum Sportminister Dan Kersch wëssen, wat fir eng Trainingsméiglechkeeten déi 4 Lëtzebuerger Futtball-Ekippen hätten, déi fir europäesch Kompetitioune gemellt sinn.

Chantal Gary

Den Dan Kersch huet gesot, dass ee kéint bei verschidde Veräiner aus dem Ausland kucken, wou Trainingen esou ëmgestallt goufen, dass kee Kierperkontakt wärend dem ganzen Training ass.

Als éischt misst awer d'Futtball-Federatioun sech Gedanke maachen an da mam Ministère kucken, fir eng adequat Léisung ze fannen. De Minister huet och gemengt, dass een eng Ausnamereegelung ustriewe kéint.