Zanter e Méindeg den Owend an der Annonce vum Premier Xavier Bettel ass en Opootmen an der Lëtzebuerger Sportswelt.

Et dierf een an Zukunft nees schwamme goen an et ass och méiglech, nees an de Sportshalen ze trainéieren. Allerdéngs léich déi lescht Decisioun, fir Infrastrukturen nees opzemaachen, net bei der Regierung, präziséiert de Sportminister Dan Kersch: "D'Regierung huet wuel decidéiert, datt d'Sportshalen net méi mussen zoubleiwen. D'Regierung kann awer net decidéieren, datt se nees all mussen opmaachen."

Den Dan Kersch

Wat d'Schwämmen ugeet, gehéiere jo och dës zu engem groussen Deel de Gemengen, hei kéint een awer dovu profitéieren, datt et schonns ee Konzept fir d'Coque gëtt, sou de Sportminister Dan Kersch.

Kersch iwwer Schwämmen an Halen/Reportage Jeff Kettenmeyer

"Mir hunn am Fong nëmmen eng ëffentlech Schwämm, wou de Staat responsabel ass an dat ass d'Coque. Mir hunn do ee Konzept ausgeschafft, wéi et soll virugoen a mir hu wëlles, de Gemengen dat och zur Verfügung ze stellen. D'Gemenge kënne sech dorun orientéieren, mussen dat awer net maachen."

Och wann elo nees kann an de Sportshalen trainéiert ginn, bleiwe verschidde Reegelen awer absolut bestoen a musse respektéiert ginn.

"D'Grondreegel ass 2 Meter Ofstand. D'Zuel vun den Athleten hänkt vun der Gréisst vum Sall oder Terrain of. Et dierf kee Kierperkontakt bestoen. Ënner deene Reegele kann trainéiert ginn."

Wann e Veräin nees wéilt trainéieren, misst e sech deemno mat der Gemeng eens ginn.

D'Federatiounen hätten an Zesummenaarbecht mam Ministère, dem olympesche Comité, de Sportsdokteren an dem Sportlycée eng Rei Recommandatiounen ausgeschafft, ënner wéi enge Konditiounen duerf trainéiert ginn. "Sou weess all Sportveräin, u wat ee sech muss halen, fir den Training sou sécher wei méiglech ze halen."