Iwerdeems spillt Mainz 2:2 géint Köln. De Leandro Barreiro gouf an der 83. Minutt fir de Boetius agewiesselt.

An der däitscher Futtball-Bundesliga war et um Sonndeg d'Suite vum 26. Spilldag. Virun eidelen Tribünen hu sech Köln a Mainz no engem spannendem Match 2:2 getrennt. Union Berlin verléiert doheem mat 0:2 géint München.

Schonns e Samschdeg stoungen eng sëlleg Matcher um Programm. Hei huet ënner anerem sech Dortmund am "Revierderby" mat 4:0 géint Schalke konnten duerchsetzen. Paderborn huet ouni de Laurent Jans 0:0 géint Düsseldorf gespillt.

26. Spilldag vun der Futtball-Bundesliga

Union Berlin - Bayern München 0:2
0:1 Lewandowski (40'), 0:2 Pavard (80')
Den Underdog aus Berlin ass besser an de Match komm a konnt duerch de Bülter an de Ujah déi eicht 2 Chancen am Match fir sech verbuchen. An der 18. Minutt huet dunn de Müller no engem Corner de Ball an de Filet konnte setzen, mee no Récksprooch mam Video Assistant Referee gouf de Gol net unerkannt. De Müller stoung liicht am Abseits. Bayern hat wuel méi Ballbesëtz, mee wierklech geféierlech virum Berliner Gol ass et net ginn. No enger onglécklecher Situatioun vum Subotic ass de Goretzka an der 40. Minutt am Berliner Strofraum gefall. De Lewandwoski sot Merci an huet de uschléissenden Eelefmeter era geschoss. Mat 1:0 fir Bayern ass et an d’Paus gaangen.

No der Paus waren Héichpunkte éischter seelen. Union stoung kompakt a Bayern hat Schwieregkeeten sech iwwerhaapt mol eng gutt Geleeënheet eraus ze spillen. D'Lokalekipp hat senger säit's awer och net déi neidesch Moyeen fir geféierlech virum Gol vum Manuel Neuer op ze dauchen. Aus dem Näischt eraus huet de Pavard an der 80. Minutt no engem Corner vum Müller de Score op 2:0 erhéicht. Bayern bleift domadder 4 Punkte virum BVB.

1. FC Köln - FSV Mainz 2:2
1:0 Uth (6'), 2:0 Kainz (53'), 2:1 Awoniyi (61'), 2:2 Kunde (72')

Nëmme 4 Minutten huet et gedauert bis den Uth eng éischte Kéier am Strofraum vun deene Mainzer opgetaucht ass. Den Niakhaté konnt de Stiermer awer just duerch e Foul stoppen. Eelefmeter fir de FC. De gefoulten Uth ass selwer ugetrueden, an huet vum Punkt säi 5. Gol am 8. Match fir d'Kölner geschoss. Mainz hat duerch de Boetius an Onisiwo gutt Chancen den Ausgläich ze markéieren, sollt awer um Leistner an um Horn säi Meeschter fannen. Mat 1:0 fir d'Lokalekipp ass et domat an d'Paus gaangen.

Och an der 2. Hallschent ass Mainz kal erwëscht ginn. No schéiner Virlag vum Drexler war et de Kainz deen de Ball äiskal an de Mainzer Filet geschoss huet. Kuerz dorops hat de Skhiri d'Chance de Score op 3:0 ze erhéijen, ass awer um Müller am Mainzer Gol hänke bliwwen. D'Gäscht hu sech awer net opginn. Nëmme 5 Minutten no senger Awiesslung war et den Awoniyi de fir Mainz no Virlag vum Quaison op 1:2 verkierze konnt. Mainz huet den Drock weider erhéicht a sou war et an der 72. Minutt de Kunde dee quasi vun der Mëttellinn Richtung Strofraum gelaf ass, d'Kölner Spiller all stoe gelooss huet, a fir den 2:2-Ausgläich gesuergt huet. Béid Ekippen hu sech an deene leschte Minutten näischt geschenkt, e Gol sollt an dëser flotter Partie awer net méi falen.

Um Sonndeg den Owend spillt nach Bremen géint Leverkusen.