E Mëttwoch den Owend hu Leipzig an d'Hertha 2:2 gläichgespillt.

An der 2.Bundesliga huet Karlsruhe sech iwwerdeems mat engem 1:1 géint Hannover d'Punkte gedeelt. Dobäi war den Dirk Carlson de ganze Match am Asaz.

28. Spilldag vun der Futtball-Bundesliga

Union Berlin - Mainz 1:1
0:1 Baku (13'), 1:1 Ingvartsen (33')

No enger roueger Ufanksphas huet Mainz direkt déi éischt gutt Chance fir sech genotzt. De Leandro Barreiro huet op der lénker Säit de Ball an engem Zweekampf gewonnen an en no engem Doppelpass flaach an d'Mëtt zréckginn. Do stoung de Baku op der richteger Plaz a konnt mat sengem Schoss den 1:0 fir d'Gäscht markéieren. 20 Minutten drop ass da wéi aus dem Näischt den Ausgläich gefall, wéi den Ingvartsen mat engem direkte Fräistouss op 1:1 gestallt huet. Kuerz virun der Paus huet den Andrich dann nach no engem Feeler um Barreiro déi Giel-Rout Kaart gesinn.

An der zweeter Hallschent war Mainz dann nees déi besser Ekipp an huet op d'Féierung gedréckt. Am leschten Drëttel huet de Gäscht awer déi néideg Konsequent gefeelt a sou ass et bis zum Schluss kee Gol méi zu Berlin ginn.

Augsburg - Paderborn 0:0

Augsburg ass gutt an de Match komm an huet d'Paderborner Ekipp mam Laurent Jans ënner Drock gesat. Mat der Zäit ass de Gaascht awer ëmmer besser ginn an huet op d'Féierung gedréckt. Zum Schluss vum éischtem Duerchgang huet sech de Match awer nees berouegt a sou ass et ouni Goler an d'Paus gaangen.

Am zweeten Duerchgang hat Paderborn weiderhin méi Chancen op eng Féierung. Augsburg krut de Géigegol awer ëmmer nees verhënnert. No 90 Minutte ass et beim 0:0 bliwwen a sou deele sech béid Ekippen d'Punkten.

Düsseldorf - Schalke 2:1
0:1 McKennie (53'), 1:1 Hennings (63'), 2:1 Karaman (68')

No de ville Géigegoler an de leschte Matcher huet Schalke sech an der éischter Hallschent op d'Defense konzentréiert. Sou hat Düsseldorf bal 80% Ballbesëtz, konnt domat awer näischt ufänken. No 45 Minutten ass domat eng éischt Hallschent ouni richteger Golchancen op en Enn gaangen.

Nom Säitewiessel huet Schalke da besser an de Match fonnt. De McKennie konnt de Gaascht mam Kapp a Féierung bréngen an Düsseldorf war domat gefuerdert eng Äntwert ze fannen. Déi ass dann och 10 Minutten drop komm. No engem Fräistouss huet de Schubert de Ball an d'Mëtt paréiert a sou war et den Hennings dee mam Kapp am schnellsten op der Plaz war an ausgläiche konnt. Düsseldorf huet no deem Gol u Confiance gewonnen a weider Tempo gemaach. No engem Corner an der 68. Minutte stoung de Karaman richteg an huet mat engem Kappball d'Lokalekipp a Féierung bruecht. Schalke konnt op de Réckstand net méi reagéieren a sou bleift et bei der wichteger 2:1 Victoire fir Düsseldorf.

Hoffenheim - Köln 3:1
1:0 Baumgartner (11'), 2:0 Baumgartner (46'), 3:0 Zuber (48'), 3:1 Kainz (60')

Hoffenheim huet an den éischte Minutten op Ballbesëtz gespillt an ofgewaart. No 11 Minutten huet sech d'Waarden dann och belount gemaach, wéi de Baumgartner aus ronn 10 Meter fräi zum Schoss komm ass. Nom Gol huet sech net all ze vill am offensive Beräich ofgespillt. Mam 1:0 ass et dann an d'Vestiairë gaangen.

An der zweeter Hallschent huet Hoffenheim dann den Tempo erhéicht an huet am Numm vum Baumgartner a vum Zuber op 2:0 an op 3:0 bannent 2 Minutte gestallt. Köln konnt méi spéit zwar nach am Numm vum Kainz op 1:3 verkierzen, Hoffenheim huet d'Féierung awer gutt erofgespillt a wënnt domat de Match zum Schluss verdéngt mat 3:1.

Leipzig - Hertha 2:2
0:1 Grujic (9'), 1:1 Klostermann (24'), 2:1 Schick (68'), 2:2 Piatek (82')

Duerch déi kloer 4:0-Victoire um leschte Spilldag am Derby géint Union Berlin ass Hertha mat vill Confiance an de Match gestart. No net mol 10 Minutten ass sou dann och den éischte Gol gefall. No engem Corner vum Plattenhardt huet de Grujic sech fräi gelaf a konnt d'Gäscht domat ongestéiert a Féierung bréngen. Leipzig hat zwar méi Ballbesëtz, wosst awer näischt domat unzefänken. Den Ausgläich ass dowéinst dann och duerch e rouende Ball entstanen. An der 24. Minutt konnt de Klostermann um kuerze Potto säi Kapp dohinner halen a sou op 1:1 stellen. Nom Ausgläich huet Leipzig mat méi Ballbesëtz de Match kontrolléiert an huet de Géigner sech net méi aus der eegener Hallschent befreie gelooss. D'Hertha huet hannen awer näischt méi zougelooss a sou ass et mat engem Remis an d'Vestiairë gaangen.

No enger gudder Stonn ass den Halstenberg no engem Feeler am Mëttelfeld mat Giel-Rout vum Terrain geflunn. Trotz Ënnerzuel ass Leipzig 5 Minutte méi spéit de Gol zur Féierung gelonge wéi de Schick aus ronn 20 Meter ofgezunn huet. De Schoss war zwar éischter ongeféierlech, ma duerch eng Onsécherheet vum Golkipp ass de Ball awer nach eragaangen. Hertha war elo also nees gefuerdert an ass sou och nees méi no vir komm. An der 81. Minutt ass de Cunha vun der Säit an de Strofraum komm a krut dobäi e Been gestallt. Den Arbitter huet op de Punkt gewisen a sou konnt de Piatek per Eelefmeter op 2:2 ausgläichen. No 90 Minutten ass de Match dann och mat deem Resultat op en Enn gaangen a sou hëllt sech Hertha ee Punkt aus Leipzig mat Heem.