Dortmund konnt sech duerch eng staark Leeschtung an der 2. Hallschecht souverän zu Paderborn behaapten. An der Paus stoung et nach 0:0.

Nom däitleche 5:0-Erfolleg vu Bayern München e Samschdeg iwwer Düsseldorf war et e Sonndeg de Mëtteg d'Suitte vum 29. Spilldag an der däitscher Futtball-Bundesliga.

Borussia Mönchengladbach huet am 1. Sonndegmatch 4:1 géint Union Berlin näischt ubrenne gelooss. Am 2. Match ass den SC Paderborn mam Laurent Jans op der Bänk géint de BVB ugetrueden. Fir d'Heemekipp gouf et eng batter 1:6-Néierlag.

E Méindeg um 20.30 Auer spillt nach Köln géint Leipzig.

29. Spilldag vun der Futtball-Bundesliga

Paderborn – Borussia Dortmund 1:6
0:1 Hazard (54'), 0:2, 1:3, 1:6 Sancho (57', 74', 90'+1), 1:2 Hünemeier (72'), 1:4 Hakimi (84'), 1:5 Schmelzer (89')

Vun der Bänk aus huet de Laurent Jans senge Matspiller missen nokucken. Déi hu sech an der Ufanksphas net verstoppt an déi dortmunder Ofwier mat couragéierten Aktiounen no vir beschäftegt. Et goung monter op an of, obwuel Dortmund géint der Enn vun der 1. Hallschecht liicht Iwwerwaasser krut. E Gol sollt awer bei all de schwaarzgiele Beméiungen net eraussprangen – 0:0 an der Paus.

No enger Partie gudde Golgeleeënheete fir de BVB konnt den Hazard de Ball knapp 10 Minutten no der Paus am Filet ënnerbréngen. Domat net genuch: kuerz drop huet de Sancho op 2:0 gesat.

© AFP

Duerch een Eelefter, gepaff wéinst engem zweiwelhaften Handspill vum Can op dortmunder Säit, koum den SC zeréck. De Sancho huet awer quasi bei der Aktioun drop mat sengem 2. perséinleche Gol fir kloer Verhältnisser gesuergt.

De Schlusspunkt, no weidere Goler vun Hakimi a Schmelzer, huet du schliisslech déi jonk englesch Vedette Sancho mat dem 6:1 fir Dortmund gesat. De Lëtzebuerger Laurent Jans ass iwwerdeems net méi agewiesselt ginn.

M'Gladbach - Union Berlin 4:1
1:0 Neuhaus (17'), 2:0, 3:1 Thuram (41', 60'), 2:1 Andersson (50'), 4:1 Pléa (81')

No rouegen éischte 15 Minutten huet d'Heemekipp an der 17. Minutt den 1:0 markéiert. Den Neuhaus konnt sech direkt géint e puer Géigespiller duerchsetzen, ofschléissen an op 1:0 setzen.

Am weidere Verlaf waren d'"Fohlen" déi besser Ekipp an hu sech kuerz virun der Paus mat engem weidere Gol belount. Den Thuram hat no enger Flank vu lénks keng gréisser Schwieregkeeten, dat ronnt Lieder eranzekäppen.

Fir déi zweet 45 Minutten haten "Die Eisernen" sech eppes virgeholl an hunn direkt mam 1:2-Uschlossgol zeréck an de Match fonnt. Op der Stonn koum d'Äntwert vun der Borussia, wéi den Thuram mam 3:1 säin 2. perséinleche Gol vum Dag markéiert huet.

Insgesamt eng verdéngte Victoire fir M'Gladbach, och nom Pléa sengem 4:1 knapp 10 Minutte viru Schluss. Union hat ni dat néidegt Duerchsetzungsverméigen, fir d'Ekipp vum Trainer Rose seriö aus dem Equiliber ze bréngen.