An der Premier League huet Wolverhampton Everton mat 3:0 geklappt. Aston Villa wënnt géint Crystal Palace a Tottenham wënnt géint Arsenal mat 2:1.

Premier League

Wolverhampton - Everton 3:0
1:0 Jimenez (45+2'), 2:0 Dendoncker (46'), 3:0 Jota (74')

D'Ekipp vum Carlo Ancelotti hat um Sonndeg de Mëtteg géint Wolverhampton keng Chance, a verléiert no 90 Minutte mat 0:3. Zemools an der 1. Hallschent ware d'Gäscht vill ze passiv. Kuerz virun der Paus krut d'Lokalekipp een Eelefmeter zougesprach, deen de Jimenez ouni Problemer era geschoss huet. Nom Téi goufe d'Gäscht dunn äiskal erwëscht. No engem Fräistouss vum Netos huet den Dendoncker mam Kapp op 2:0 erhéicht. De agewiesselte Jota huet an der 74. Minutt fir de Schlusspunkt gesuergt.

Aston Villa - Crystal Palace 2:0
1:0 Trezeguet (45+4'), 2:0 Trezeguet (59')

D'Villans hunn an der 4. Minutt vun der Nospillzäit an der 1. Hallschent eng éischte Kéier duerch den Trezeguet zougeschloen. An der 59. Minutt sollt den Ägypter op 2:0 erhéijen. Fir d'Lokalekipp eng ganz wichteg Victoire em de Kamp géint den Ofstig.

Tottenham - Arsenal 2:1
0:1 Lacazette (16'), 1:1 Son (19'), 2:1 Alderweireld (81')

An der 10. Minutt gouf et eng éischte Kéier richteg geféierlech virum Gol vun de Gunners. De Kane konnt de Ball awer net laanscht de Martinez bréngen. Gutt 20 Meter virum Gol huet dunn an der 16. Minutt de Lacazette säi Kennen ënner Beweis gestëllt, an de Ball mat engem Knaller-Schoss an de Filet gesat. Laang sollt d'Féierung awer net vu Bestand sinn. De Son konnt 3 Minutten nom Réckstand no engem kapitale Feeler vum Kolasinac fir d'Lokalekipp ausgläichen. De Martinez am Gol vu Arsenal huet e ganz gudde Match gemaach, an huet net nëmme beim Schoss vum Davies eng fantastesch Reaktioun gewisen. Mat 1:1 ass et an d'Paus gaangen.

Am Nordlondon-Derby ass Arsenal besser aus de Vestiairë komm. Sou hat de Aubameyang an der 59. Minutt Pech, säi Schoss sollt just widder d'Lat goen. Knapps 10 Minutte virum Schluss ass de Alderweireld am Strofraum no engem Corner vum Son frei zum Kappball komm an huet dem Martinez keng Chance gelooss. Arsenal hat an de leschte Minutten näischt méi ze radetten sou dass Tottenham eng ganz wichteg Victoire fir Europa Plaze ka feieren.

Bournemouth - Leicester 4:1
0:1 Vardy (23'), 1:1 Stanislas (66'), 2:1 Solanke (67'), 3:1 Stanislas (83'), 4:1 Solanke (87')

No 45 Minutte louch de Favorit vu Leicester nach mat 1:0 a Féierung. No der Paus sollt sech d'Blat awer zu 180 Grad dréinen. Bournemouth huet de Match innerhalb vu nëmme 2 Minutte gedréint. Ausserdeem krut de Söyüncü no enger Tätlechkeet déi Rout-Kaart gewisen. De Solanke, deen iwwer 2 Joer kee Gol méi geschoss huet, trefft gläich zweefach. Leicester léisst domat wichteg Punkten em Champions League leien, iwwerdeems Bournemouth sech am Ofstigskampf zeréck mellt.

Serie A

Florenz - Verona 0:1
0:1 Faraoni (18')

La Liga

Levante - Ath. Bilbao 1:2
0:1 Garcia (4'), 0:2 Garcia (45+1'), 1:2 Bardhi (71')

No enger 2:0-Féierung ass et an de Schluss-Minutten nach emol spannend ginn, ma sollte Gäscht déi 3 Punkte mat op Bilbao huelen. Athletic huet am Kampf em Qualifikatioun fir d'Europa League eng ganz wichteg Victoire géint Levante agefaangen.

Leganes - Valencia 1:0
1:0 Perez (18')