15 Joer ass diskutéiert ginn, elo ass den neie Futtball- a Rugbystadion endlech fäerdeg.

Oder besser gesot bal fäerdeg. Am Oktober, spéitstens November, sollen d’Aarbechte fäerdeg gestallt sinn. Momentan sinn 92,5 Prozent vun den Aarbechte gemaach, sou d'Lydie Polver. Da sinn 2 Méint geplangt fir déi ganz Infrastruktur ze préiwen an en place ze setzen. Ier den éischte Ball rullt, huet déi Stater Buergermeeschtesch Lydie Polfer en Donneschdeg awer schonn annoncéiert, dass de Stadion "Stade de Luxembourg" soll heeschen.

51 Milliounen Euro sollt de Stadion an engem Avant-Projet am Juli 2015 kaschten. Vun deene sollt de Sportministère 70 Prozent iwwerhuelen, mat awer engem Maximum vu 40 Milliounen euro. Den definitive Projet gouf am Dezember 2016 mat ronn 61 Millioune gestëmmt. Um Enn kascht de Stadion awer elo knapp 77 Milliounen Euro, vun deenen de Sportministère nach ëmmer 40 Milliounen iwwerhëlt.

Wéinst zwee stramme Wanter goufen et Retarde bei den Aarbechten an duerch d'Corona-Kris krut een och bestallte Wuer aus dem Ausland net mat Zäiten erbäi. Elo gesäit een awer Liicht um Enn vum Tunnel.

Am Prinzip soll den éischte Match am Stade de Luxembourg d'nächst Joer am Mäerz gespillt ginn.

Weider Detailer a Biller ginn et en Donneschdeg den Owend am Journal vun der Télé.

© Eric Steichen /RTL