De Lëtzebuerger Comité Olympique huet sech op administrativem Plang mat zwou Damme verstäerkt.

Op där enger Säit ass dat mam Lis Rottler-Fautsch, déi an de Pool vun de Gestionnairë fir déi lafend Geschäfter kënnt a sech do virun allem ëm de Marketing an d'Kommunikatioun soll këmmeren.

Déi 33-Joer-al Fechterin huet hir Studien an deem Beräich gemaach, méi genee am Sportmanagement an der Kommunikatioun. Si hätt matkritt, datt den olympesche Comité seng Equipe wéilt verstäerken a wier dunn op si duergaangen, sot d'Lis Rottler-Fautsch am RTL Interview. Si fänkt de 15. September un.

D'Olympesch Spiller d'nächst Joer zu Tokio bleiwe fir d'Elite-Fechterin vun der Arméi awer och weiderhin en Thema, wéi si eis confirméiert huet. Zejoert koum déi bescht Lëtzebuerger Fechterin op der Weltmeeschterschaft op déi 7. Plaz. Deemools an Ungarn war esouguer eng Medail dran.

Nieft der Lis Rottler-Fautsch an der Kommunikatioun gouf d'Bettina Nellen vum 1. Oktober un als Juristin engagéiert.