13. Succès fir d'Ekipp aus der franséischer Haaptstad an der Coupe de France, dat nom 1:0-Erfolleg géint eng couragéiert Ekipp vu Saint-Étienne.

Coupe de France

Paris Saint-Germain - AS Saint-Étienne 1:0
1:0 Neymar (14')

Den Underdog vu Saint-Étienne koum gutt géint de Favorit vum PSG an de Match a konnt sech dann och direkt an den Ufanksminutten déi eng oder aner gutt Golgeleeënheet erausspillen. Et waren awer d'Jonge vum Trainer Tuchel, déi mat 1:0 konnten a Féierung goen, dat wéi den Neymar e vum Kipper ofgeblockte Ball am Filet ënnerbrénge konnt - 1:0 an der Paus.

Bémol fir PSG: Den Mbappé huet an der 1. Hallschecht wéinst enger Blessur missen ausgewiesselt ginn. / © AFP

Nodeems Saint-Étienne an der 1. Hallschecht de Perrin no engem Foulspill op den Mbappé fréizäiteg dusche goe konnt, haten et seng Teamkolleegen am 2. Duerchgang ufangs schwéier géint d'Paräisser. Ma de PSG konnt awer laang den Deckel net op dës Partie leeën an esou goung et an eng Schlussphas mat engem knappe Virsprong vun engem Gol fir Paräis. Um Enn huet beim Underdog awer dat néidegt Duerchsetzungsverméige gefeelt, fir nach emol an Ënnerzuel an de Match ze fannen. De PSG kann elo mat dësem Succès am Réck a säin Champions-League-Match géint Atalanta Bergamo goen.

Serie A

AC Milan - Atalanta Bergamo 1:1
1:0 Çalhanoglu (14'), 1:1 Zapata (34')

An eeben d'Ekipp vun Atalanta Bergamo stoung e Freideg den Owend och um Terrain, dat géint den Noper vu Mailand. D'Rossoneri sinn am eegene Stadion mat 1:0 a Féierung gaangen, kruten awer 20 Minutten drop den 1:1-Ausgläich kasséiert. Do kuerz virdrun, an der 26. Spillminutt, konnt de Kipper vum AC, den Donnarumma, een Eelefter vum Malinovsky ganz gutt paréieren.

Nom Säitewiessel sollten du keng Goler méi falen, soudatt mat engem 1:1-Remis gedeelt gouf. An der Tabell steet Bergamo op der 2. Positioun, Milan ass den Ament op Plaz 6.

Den Zapata huet sengem Club, no engem 0:1-Réckstand, mat sengem Gol e Punkt geséchert. / © AFP