Et ass u sech laanscht d'Ëffentlechkeet gaangen, ma et gouf jo e Wiessel um Presidenteposte bei der Lëtzebuerger Rugbyfederatioun.

Op der leschter Generalversammlung ass de President sortant Steve Karier nom éischte Walgang net méi fir deen zweeten ugetrueden. Jean-François Boulot heescht elo den neie Mann un der Spëtzt vun der FLR.

Neie President FLR / Rep. Fränky Hippert

Et hat u sech näischt drop higedeit, datt de Steve Karier sech géif nom 1. Walgang zeréckzéien. Hie wéilt och virleefeg näischt soen, sot hien eis. Déi Wale waren awer scho speziell, den neie President vun der Lëtzebuerger Rugbyfederatioun Jean-François Boulot: "Bei deenen 11, déi gewielt goufen, sinn der 9 nei. Mir mussen also zimmlech bei 0 ufänken. Projeten hu mer."

Et ass awer scho speziell, wa bei enger Federatioun bei Walen op eemol 9 Leit vun 11 nei sinn. Do kéint ee jo mengen, do wär eppes virgefall: "Nee, fir d'AG, déi Leit, déi sech presentéiert hu fir d'Walen, hate mer 20 Leit, déi sech opgesat hate fir 11 Plazen, voilà. Déi aner 8, et schwätzt awer näischt dogéint, och deenen nozelauschteren. Ech sinn e Mann vum Terrain an ech lauschtere jiddwerengem no."

Déi Lëtzebuerger Rugbyswelt ass zimmlech international. De Jean-François Boulot ass als jonke Mënsch wärend sengem Militärdéngscht a Frankräich bei de Rugby komm. Zënter 24 Joer schafft de Fransous hei am Land an zënter 3 Joer wunnt hien och hei. Den Employé vun enger Lëtzebuerger Bank wëll virun allem bei der Jugend d'Efforte verstäerken.

D'Lëtzebuerger Rugbyfederatioun war elo an de leschte Joren um gudde Wee, ëmmer méi grouss a populär ze sinn. Aktuell schéngt een an e bësse méi onrouege Gewässer ënnerwee ze sinn. De neie President schéngt awer op Kontinuitéit ze setzen, huet awer och seng Virstellungen, wat nach muss geschéien, zum Beispill méi present an de Schoulen a Lycéeë ginn. Dat, fir och d'Valeure vum Rugby bekannt ze maachen.

Rugbyfederatioun an Zukunft / Rep. Fränky Hippert

Wann eng nei Ekipp an e Verwaltungsrot vun enger Federatioun kënnt, gëtt meeschtens och d'Fro opgeworf, wei et mam Nationaltrainer weider geet, dozou de Jean-François Boulot: "Am Moment kann ech nach näischt soen. Ech wäert de Jonathan Flynn mat e puer Leit vum CA gesinn, da kucken mer, ob mer him eist Vertrauen weider kënnen ausschwätzen. Et spillen awer duerch déi aktuell Situatioun och finanziell Aspekter eng Roll. Mir musse kucken, ob mer eens ginn. Am Moment kann ech awer net soen, wéi et weider geet."

Bei de Jonke ginn et hei am Land och eng Rei Talenter. Zwee ginn elo zum Beispill a Frankräich a Centres de formation fir Rugbyspiller; een op Metz an ee esouguer op Lyon, Tabellenzweeten an der héchster Divisioun bei de Profien.