Et war gewosst, datt de Lëtzebuerger Comité Olympique op der Sich no engem neien Directeur technique wär.

Et huet missen e Successeur fir den Heinz Thews fonnt ginn, deen am Abrëll 2022 an d'Pensioun geet. Mam Raymond Conzemius huet de COSL dann och en neie Mann fonnt.

Raymond Conzemius beim COSL (1)/Reportage Franky Hippert

Et war och gewosst, datt de Comité Olympique an de leschte Méint bei forméierte Sportsproffen hei am Land sondéiert hat. Dunn ass de Choix vun deene Responsabele vum Daachverband vum privatorganiséierte Sport hei zu Lëtzebuerg op de Raymond Conzemius gefall.

"Wéi ass et dozou komm? Ech hunn an de leschte Méint Gespréicher gehat. Ech muss soen, datt ech do virdrun nach guer net doru geduecht hunn. Do virum Confinement hat ech e Gespréich mam COSL-President André Hoffmann gehat a si ware bis dohin nach net "fündeg" ginn. Dunn huet sech erausgestallt, datt ech awer Interessi hat. No Gespréicher mat der Famill hunn ech dann decidéiert, den neien Challenge unzehuelen.", esou de Raymond Conzemius.

Datt ënnert dem Stréch awer de Raymond Conzemius géif erauskommen, war dach iwwerraschend, virun allem, wann ee weess, datt den Direkter vum Sportlycée de Papp vun där Schoul ass an elo dann hannert sech léisst.

"Ech hunn 2001 an de Sportklassen an deemno de Parcours mat Sportetüde vum Sportlycée materlieft an ech gesinn, datt de Bëbee elo groussjäreg ass an ech weess, datt eng Stabilitéit do ass, déi mer Gewëssheet gëtt, datt dat och ouni mech wäert lafen. Déi Deeg éiert ech et de Leit an der Schoul matgedeelt hunn, fir ze soen, datt ech géif fortgoen, ass mer schwéier gefall. Do waren e puer net esou flott Nuechten dobäi. Ech war awer du frou, datt d'Reaktioune vun de Leit positiv waren."

De 54 Joer ale Raymond Conzemius, deen nach ëmmer de Lëtzebuerger Rekord am Héichsprong mat 2 Meter 22 huet, fänkt den 1. November op senger neier Plaz un.

Raymond Conzemius beim COSL (2)/Reportage Franky Hippert

Den Heinz Thews ass zënter 2002 techneschen Direkter vum Lëtzebuerger Olympesche Comité. Éiert de 66 Joer alen Däitschen, deen no den Olympesche Wanterspiller an zwee Joer zu Peking an d'Pensioun geet, vun der Lëtzebuerger Dëschtennisfederatioun eriwwer bei den COSL gewiesselt war, war eisen Informatiounen no de Raymond Conzemius Ufank den 2000er schonn an der Course fir déi Plaz. "Jo effektiv, dat wësse ganz wéineg Leit, datt ech deemools gefrot gouf, mä deemools war ech nach jonk an ech hat net d'Gefill, datt ech scho genuch Erfarung hätt. Lo, wéi ech déi zweete Kéier gefrot gouf, hunn ech mer gesot, esou eng Chance kënnt net nach eng Kéier."

Wann een uewen an der Spëtzt genuch Toppathlete wëll erauskréien, dann ass et besonnesch an engem klenge Land ëm sou méi wichteg, datt eng breet Basis do ass. Wëll heeschen, datt am jéngsten Alter d'Kanner de Goût un der Beweegung an um Sport kréie mussen an däers ass sech de Sportsprof, deen zu Louvain op der Uni studéiert huet, méi wei bewosst.

"Well ech och hoffen, op där Plaz dat eent oder anert kënnen ze beweegen. Ech wäert meng Originnen net ignoréieren, dat heescht d'Talentfërderung an d'Jugend läit mir um Häerz."

De COSL huet sech 2014 mam integréierte Sportkonzept en Outil ginn, fir de ganze Lëtzebuerger Sport no vir ze bréngen. Bis elo bleift nach vill Loft no uewen. Ma de Raymond Conzemius weess jo beschtens, wat muss gemaach ginn, fir datt dat ännert.