Arsenal wënnt den FA Cup duerch zwee Goler vum Aubameyang, Antwerpen séchert sech den éischten Titel säit 28 Joer a Porto mécht den Doublé perfekt.

FA Cup Finall

Arsenal - Chelsea 2:1
0:1 Pulisic (6'), 1:1 Aubameyang (28'), 1:2 Aubameyang (67') 

Chelsea ass et gelonge fréi a Féierung ze goen, wéi de Pulisic an der 6. Minutt no enger Flank vum Mount op 1:0 stelle konnt. D'Blues waren déi besser Ekipp an hunn de Match bestëmmt, mat der Zäit huet Arsenal awer ëmmer méi d'Kontroll iwwert de Match gewonnn. An der 26. Minutt huet sech dann den Azpilicueta ongeschéckt ugeluecht an den Aubameyang am Strofraum zum Fale bruecht. Deen huet sech dës Chance net huele gelooss a vum Punkt op 1:1 ausgeglach. Weider haten d'Gunners déi besser Chancen op d'Féierung, trotzdeem ass et mat engem Remis an d'Paus gaangen.

Nom Säitewiessel hat Chelsea dann nees mat méi Ballbesëtz d'Kontroll, dat awer ouni richteg Golchancen. Et huet ee gemierkt dass béid Ekippe mat deenen ongewinnt héijen Temperaturen ze kämpfen haten. Vun der éischter Chance am zweeten Duerchgang huet Arsenal dann awer direkt profitéiert, wéi den Aubameyang de Zouma stoe gelooss huet a mat engem Lop iwwert de Golkipp op 2:1 fir d'Gunners gestallt huet.
Ronn 20 Minutte viru Schluss sinn d'Chancen op eng Victoire fir Chelsea dann nach méi kleng ginn, wéi de Kovacic den Xhaka zum Fale bruecht huet an doropshin mat Giel-Rout vum Terrain geflunn ass. An Iwwerzuel huet Arsenal bis zum Schluss näischt méi ubrenne gelooss a sou wannen d'Gunners d'Finall vum FA Cup am Wembley Stadium zu London. Duerch d'Victoire qualifzéiert sech Arsenal iwwerdeems nach fir d'Europa League, wat een dës Saison an der Premier League net gepackt hat.

Coupe-Finall Belsch

Club Bruges - Antwerpen 0:1
0:1 Lior Refaelov (25')

Bruges ass als Favoritt an dëse Match gaangen an huet an der Ufanksphas och den Toun uginn. Ma déi éischt Chance hat d'Ekipp vun Antwerpen Opweises a sou huet et och net laang gedauert bis och sie an d'Partie fonnt hunn. An der 25. Minutt huet sech Antwerpen dann och belount, wéi de Refaelov no engem Zouspill komplett eleng virum eidele Gol stoung a sou op 1:0 stelle konnt. No der Féierung huet Antwerpen weiderhin immens disziplinéiert gespillt a Bruges sou zu kenger richteger Golchance komme gelooss.

Am zweeten Duerchgang huet ee sech wéinst der Féierung haaptsächlech op d'Defense konzentréiert. Bruges huet no Solutione gesicht, dat awer ouni succès. Mat vill Kampf bréngt Antwerpen déi knapp Féierung bis zum Schluss iwwert d'Zäit a wënnt domat den éischten nationalen Titel zanter 28 Joer.

Coupe-Finall Portugal

Benfica - Porto 1:2
0:1 Mbemba (47'), 0:2 Mbemba (58'), 1:2 Jota

Déi éischt Minutte vum Match hunn dem amtéierende portugiesesche Champion gehéiert a sou hat de Corona schonn no 5 Minutten eng éischt gutt Chance, déi de Golkipp awer mat engem gudde Reflex paréiere konnt. Un de ville Feeler an Zweekämpf huet ee gemierkt dass tëscht béide Veräiner eng gewësse Rivalitéit besteet. Sou huet et och net laang gedauert bis den éischte Spiller vum Terrain geflunn ass. An der 38. Minutt huet sech de Luis Diaz seng zweet Giel Kaart agefaangen an huet Porto schonn am éischten Duerchgang an Ënnerzuel bruecht. Turbulent ass et da ronn 5 Minutten drop weider gaangen, wéi den Trainer vum FC Porto genau sou déi zweet Giel Kaart gesinn huet a sou op d'Tribün geschéckt ginn ass.

Kuerz nom Säitewiessel ass Benfica dann a Réckstand komm, wéi den Mbemba mam Kapp op der richteger Plaz stoung an d'Féierung fir Porto markéiere konnt. Gutt 10 Minutte méi spéit huet den Mbemba dann eng weider kéier zougeschloen a mat engem staarke Kappball op 2:0 erhéicht. Ronn 5 Minutte viru Schluss huet de Carlos Vinicius dann zwar nach op 1:2 verkierzt, ma um Enn bréngt Porto d'Féeirung iwwert d'Zäit a mécht domat den Doublé perfekt.

Serie A

Atalanta - Inter 0:2
0:1 D'Ambrosio (1'), 0:2 Young (20')

Juventus - AS Roum 1:3
1:0 Higuain (5'), 1:1 Kalinic (23'), 1:2 Perotti (44'), 1:3 Perotti (52')

Neapel - Lazio Roum 3:1
1:0 Fabian (9'), 1:1 Immobile (22'), 2:1 Insigne (54'), 3:1 Politano (90+2')