D'Nummer 1 op der Welt ass e Sonndeg an den 1/8-Finalle vun de US Open disqualifizéiert ginn, well hien eng Linieriichterin mat engem Ball getraff huet.

An der Aachtelsfinall um Enn vum 1. Saz war d'Nummer 1 op der Welt no verluerene Sazbäll sou frustréiert a rosen, datt en e Ball no hanne geschloen huet. Dobäi huet en eng Linieriichterin um Hals getraff. Déi krut fir een Ament keng Loft.

Den Djokovic selwer war ganz erféiert, ass bei d'Fra gaangen an huet sech entschëllegt.

Déi Offiziell hunn awer kee Pardon kannt an hunn de Favorit vum Tournoi, deen dëst Joer nach kee Match verluer huet, disqualifizéiert.

Den Novak Djokovic verléiert säi Präisgeld vun 250.000 Dollar an e muss zousätzlech eng Strof vun 10.000 Dollar bezuelen.