De Lars Gerson huet um Méindeg mat senger Ekipp Norrköping 2:0 géint Kalmar FF gewonn.

Sonndeg

Um Sonndeg de Mëtteg war de FC Metz op Besuch beim OSC Lille. Ouni de Laurent Jans, deen net am Kader vun de Gäscht stoung, huet et laang no engem 0:0-Gläichspill ausgesinn. An der 88. Minutt huet dunn de Luiz Araujo den entscheedende Gol fir Lille geschoss, déi de Match domat mat 1:0 gewannen.

An der Proximus League an der Belsch huet den Anthony Moris 1:1 auswäerts géint U23 vu Brugge gespillt. De Lëtzebuerger Golkipp stoung déi 90 Minutten iwwer um Terrain.

An der amerikanescher MLS huet New York City 2:1 géint de FC Cincinnati gewonnen. De Lëtzebuerger Nationalspiller Maxime Channot stoung déi 90 Minutten um Terrain a krut an der 84. Minutt déi Giel Kaart gewisen.

Liest hei de Resumé vum Match bei de Kolleege vu 5minutes.

Samschdeg

Fir den Dirk Carlson, deen de ganze Match iwwer op der Bänk huet misse Plaz huelen, ass d'Aventure DFB-Pokal no der 1. Ronn schonns eriwwer. Karlsruhe verléiert no Verlängerung mat 0:1 géint Union Berlin.

An der 2. Divisioun an England war den Danel Sinani net am Kader fir de Match géint Huddersfield. Norwich huet de Match duerch e Gol an der 81. Minutt duerch den Idah mat 1:0 gewonnen.

De Lëtzebuerger Enes Mahmutovic stoung bei der 0:4-Defaite déi 90 Minutten iwwer um Terrain. An der Paus stoung et nach 0:1, ma an de zweete 45 Minutten hat Lviv keng Chance géint Kolos Kovalivka.

A Russland war et fir de Konto vum 7. Spilldag de Match FK Tambov géint de FK Ufa. De Gritasenko huet den 1:0 fir d'Lokalekipp an der 42. Minutt geschoss. De Olivier Thill ass an der 55. Minutt op Säite vun Ufa agewiesselt ginn. Mee och hie sollt den 0:1 Réckstand net méi kënne gutt maachen. No 90 Minutten heescht et 2:0 fir Tambov. De Sebastien Thill ass no sengem Wiessel vu Nidderkuer a Russland nach net am Kader vun Tambov gewiescht.

OFI Kreta huet a Griicheland ouni de Vahid Selimovic 1:1 géint Panetolikos gespillt.

Freideg

E Freideg den Owend war den Optakt vum 1. Tour am däitschen DFB-Pokal. Mainz, d'Ekipp vum Leandro Barreiro, huet et hei mam TSV Havelse aus der Regionalliga Nord ze kritt. No 90 Minutte konnt sech d'Ekipp vum Beierlorzer mat 5:1 duerchsetzen. De Lëtzebuerger Nationalspiller gouf an der 85. Minutt agewiesselt.

Déi Mainzer hu sech géint den Underdog laang schwéier gedoen. Schonn an der 17. Minutt war een duerch e Gol vum Plume mat 0:1 a Réckstand geroden. An der 57. Minutt konnten d'Gäscht dunn awer duerch de Mateta op 1:1 ausgläichen. An de leschte 15 Minutten huet d'Ekipp aus der Bundesliga dunn awer nach gewisen, datt si déi méi staark sinn an esou gouf et um Enn dach nach eng kloer 5:1-Victoire. D'Goler hunn de Szalai (77'), de Mateta (78', 90') an de Quaison (86')  geschoss.

E Freideg den Owend war nach eng zweet Partie am DFB-Pokal. Hei huet sech Braunschweig aus der 2. Bundesliga an engem verréckte Match mat 5:4 géint d'Hertha vu Berlin aus der Bundesliga duerchgesat (1:0 Kobylanski (2'), 2:0 Milltelstädt Selbstgol (17'), 2:1 Lukebakio (23'), 2:2 Cunha (29'), 3:2 Kobylanski (44'), 3:3 Pekarik (6:5), 4:3 Kobylanski (67'), 5:3 Abdullahi (73'), 5:4 Lukebakio (83')).

Mam Gerson Rodrigues war e Freideg den Owend nach een zweete Lëtzebuerger Futtball-Nationalspiller am Ausland am Asaz. An der Ukrain huet Dynamo Kiew géint Desna 0:0 gläichgespillt. De Rodrigues gouf bei Kiew an der 64. Minutt agewiesselt.