E Mëttwoch den Owend huet d'Ekipp vum Lëtzebuerger an der russescher Coupe déi nächste Ronn erreecht.

Ufa konnt sech no 90 Minutte mat 1:0 géint Leningrad behaapten. Den Olivier Thill stoung bei Ufa an der Startformatioun a gouf an der 68. Minutt ausgewiesselt. An der nächster Ronn kritt Ufa et mat Chertanovo Moskau ze dinn.

Mëttwoch

De Christopher Martins an d'Young Boys Bern wäerten déi nächst Saison net an der Champions League spillen. De schwäizer Champion huet e Mëttwoch am 3. Tour vun der Qualifikatioun mat 0:3 géint den FC Midtjylland verluer. Den 23 Joer ale Lëtzebuerg stoung déi 90 Minutten iwwer um Terrain. D'Young Boys Bern trieden elo an de Playoffs fir d'Europa League un.

Dënschdeg

An der Champions-League-Qualifikatioun huet sech Dynamo Kiew en Dënschdeg den Owend mat 2:0 géint Alkmaar duerchgesat.

Dynamo Kiew steet domadder an der nächster Ronn vun der Qualifikatioun. De Gerson Rodrigues stoung déi 90 Minutten iwwer fir Kiew um Terrain an hat seng Ekipp an der 49. Minutt mat 1:0 a Féierung. De Sharparenko hat an der 88. Minutt mam 2:0 fir d'Schlussresultat gesuergt.

An de Playoffs spillt Kiew géint Gent. Hei geet et dann ëm den Ticket fir d‘Gruppephas vun der Champions League.