Och de Marvin Martins, Vahid Selimovic, Lars Gerson a Maxime Chanot feiere Victoiren mat hiren Ekippen.

An der éischter Portugisescher Liga wanne Gil Vicente an den Tim Hall mat 1:0 géint Portimonense. De Lëtzebuerger Tim Hall konnt awer net matwierken a souz 90 Minutten op der Bänk.

Den anere Lëtzebuerger dogéint deen an der éischter Portugisescher Liga bei Funchal spillt, de Vincent Thill, stoung an der Startopstellung a ka mat 1:0 géint Farense gewannen. An der 57. Minutt gouf de Vincent Thill ausgewiesselt.

90 Minutten als Rietsverdeedeger um Terrain stoung de Marvin Martins mat Casa Pia an der zweeter Portugisescher Liga a spillen 1:1 géint Vizela.

An der éischter Griichescher Liga koum de Vahid Selimovic 90 Minutten zum Asaz a spillt mat OFI Kreta 2:2 gläich géint Atromitos.

Och 90 Minutten um Terrain stoung de Lars Gerson mat Norrköping géint Djurgarden an der éischter Schwedescher Divisioun. 2:1 konnt de Lars Gerson mat senger Ekipp gewannen.

An der éischter amerikanescher Divisioun wënnt de Maxime Chanot mat New York City mat 4:0 géint Cincinatti. De Lëtzebuerger stoung de ganze Match iwwer um Terrain.

An der 2. däitscher Bundesliga verléiert de Karlsuher SC mat 0:1 doheem géint de VFL Bochum. De lëtzebuergeschen Nationalspiller Dirk Carlson souz déi 90 Minutten iwwer op der Bänk.

An der Ukraine huet den FK Lviv mat 0:5 géint Luhansk verluer. De Lëtzebuerger Enes Mahmutovic stoung net am Kader.

Samschdeg

An der 3. däitscher Liga huet den 1. FC Saarbrécken mat 2:0 géint Hansa Rostock gewonnen. Dobäi war de Maurice Deville 76 Minutte laang am Asaz. An der Tabell steet Saarbrécke mat engem Remis an enger Victoire no zwee Spilldeeg op der 4. Plaz.

An der Bundesliga huet Mainz 05 mam Leandro Barreiro mat enger 1:4-Defaite géint Stuttgart de Kierzere gezunn. De Lëtzebuerger Nationalspiller ass an der 69. Minutt ausgewiesselt ginn.

An der Ligue 1 a Frankräich huet Metz an der Nospillzäit nach den 1:1-Ausgläich bei Olympique Marseille kasséiert. De Laurent Jans souz bei Metz déi 90 Minutten iwwer op der Bänk.

Am Championnat an der Belsch hat den Danel Sinani säin éischten Optrëtt fir Waasland-Beveren. Bei der 2:3-Defaite bei Beershot gouf de Lëtzebuerger Nationalspiller an der 86. Minutt agewiesselt.

An der zweeter Divisioun an der Belsch huet den Golkipp vun de Roude Léiwen Anthony Moris mat senger Ekipp Royale Union St. Gilloise auswäerts mat 1:3 géint RWDM de Kierzere gezunn. De Moris stoung 90 Minutten am Gol.

Am Russesche Championnat huet Ufa eng héich 0:6-Néierlag bei Zenit kasséiert. Den Olivier Thill war net am Asaz. Donieft huet Tambow ouni de Sebastien Thill mat 0:2 géint Spartak Moskau verluer.

Am Championnat an der Schwäiz hunn d'Young Boys Bern ouni de Christopher Martins zu Sion 0:0 gläich gespillt.

An der Ukrain war och de Gerson Rodrigues e Samschdeg net am Asaz. Seng Ekipp Dynamo Kiew huet auswäerts kloer mat 4:0 géint Minaj gewonne.