Mat 6:0, 6:2, 7:5 wënnt de Spuenier géint den Novak Djokovic a séchert domadder säin 13. Titel zu Roland Garros a säin 20. Grand-Slam-Titel.

Am éischte Saz vun der Finall vun de French Open huet de Kinnek op Sand, Rafael Nadal, der Nummer 1 op der Welt, Novak Djokovic, guer keng Chance gelooss an huet dëse mat 6:0 gewonnen.

Am zweete Saz huet den Novak Djokovic et probéiert, mee de Rafael Nadal huet excellent gespillt an huet dem Serb keng Ugrëffsfläch ginn, fir hien zu Feeler ze zwéngen. Sou huet de Spuenier och dëse kloer mat 6:2 fir sech entscheet. An den éischten zwee Sätz zesummen, sinn dem Rafael Nadal just 4 "unforced errors" passéiert. Dem Djokovic dogéint der iwwer 30. Mee trotz allem huet och de Serb en excellente Match gespillt, mee de Spuenier huet einfach iwwermächteg gewierkt.

Den drëtte Saz war dann immens spannend wëll den Novak Djokovic huet richteg dogéint gehalen, mee trotz allem wënnt den Nadal och dëse mat 7:5 a séchert sech domadder säin 13. Titel bei de French Open an insgesamt säin 20. Grand-Slam-Titel. Dëst war bis e Sonndeg just dem Roger Federer gelongen.