De Lëtzebuerger Nationalspiller stoung de Weekend net am Kader vu sengem Veräin an der éischter portugisescher Liga.

An der Nuecht op e Méindeg war de Maxime Chanot an der MLS an den USA mat sengem Veräin New York City am Asaz. De Lëtzebuerger stoung bei der 1:3-Néierlag géint Columbus Crew de ganze Match um Terrain.

Nodeems den Tim Hall e Samschdeg bei Gil Vicente net am Kader stoung, huet hien e Sonndeg iwwert déi sozial Medie bekannt ginn, datt e positiv op de Coronavirus getest ginn ass.

Sonndeg

Am hollännesche Championnat huet Sparta Rotterdam 1:1 bei Feyenoord Rotterdam gläichgespillt. De Mica Pinto stoung bei Sparta déi 90 Minutten iwwer um Terrain. Den decisive Gol huet den Thy an der 52. Minutt per Eelefmeter geschoss. No 5 Matcher steet Sparta Rotterdam op der leschter Plaz an der Tabell, dat mat nëmmen 2 Punkten.

Freeë konnt sech e Sonndeg de Sebastien Thill iwwer dräi Punkten. De Lëtzebuerger Nationalspiller huet mat sengem Veräin Tambow auswäerts 2:0 géint Volgograd gewonnen. Den Thill war an der 68. Minutt fir de Karapetian op den Terrain komm.

Den Olivier Thill huet iwwerdeems säi Kontrakt mam russesche Veräin FK Ufa opgeléist. Wéi et elo beim Lëtzebuerger Futtballer weidergeet, ass nach net gewosst.

An der 3. Liga an Däitschland huet Saarbrécken mam Maurice Deville 2:1 géint Unterhaching gewonnen. De Lëtzebuerger stoung an der Startformatioun a gouf an der 46. Minutt ausgewiesselt. No 4 Matcher steet Saarbrécken an der Tabell op der zweeter Plaz mat 10 Punkten. Leader ass 1860 München mat engem Match méi an 11 Punkten.

An der zweeter Divisioun a Portugal souz den Eric Veiga bei Vilafranquense déi 90 Minutten iwwer op der Bänk. Um Enn huet een 2:2 bei Covilha gespillt.

Eng souverän Victoire gouf et fir Norrköping an de Lars Gerson. Mat 3:1 huet ee sech bei Varbergs BoIS behaapt. De Lëtzebuerger Nationalspiller stoung vun Ufank un um Terrain. No 24 Matcher steet Norrköping mat 39 Punkten an der Tabell op der zweeter Plaz. Leader ass Malmö. Si hu bei engem Match manner 47 Punkten um Konto.

An der 2. Divisioun a Frankräich huet Royale Union St. Gilloise mam Anthony Moris am Gol 2:0 zu Lierse gewonnen. De Lëtzebuerger Nationalgolkipp krut an der 59. Minutt déi giel Kaart gewisen.

An a Frankräich huet Lille d'Ekipp vum President Gérard Lopez Lens mat 4:0 iwwerrannt. No 7 Matcher steet Lille un der Tabellespëtzt vun der Ligue 1.

Samschdeg

An der däitscher Bundesliga huet Mainz mat 0:1 géint Leverkusen de Kierzere gezunn. Bei de Mainzer souz de Leandro Barreiro 90 Minutten op der Bänk.

An der 2. Bundesliga konnt den Dirk Carlsson mat Karlsruhe eng kloer 3:0-Victoire géint Sandhausen feieren. De Lëtzebuerger gouf hei an der 88. Spillminutt agewiesselt.

An der 3. däitscher Liga hat dem Jeff Saibene säin FC Kaiserslautern et mat der zweeter Ekipp vu Bayern München ze dinn. Um Enn gouf et beim 0:0-Remis deen drëtte Punkt am drëtte Match ënnert dem Lëtzebuerger Trainer. Kaiserslautern steet domadder weiderhin op enger Ofstigsplaz.

Am Championnat an der Belsch gouf et een 1:1-Remis tëscht Léck a Bruges. De Laurent Jans gouf beim Standard an der 4. Minutt vun der Nospillzäit agewiesselt.

Bei der 2:1-Victoire fir de Marvin Martins a Casa Pia an der portugisescher LigaPro géint Porto B stoung de Lëtzebuerger 90 Minutten um Terrain. Hi konnt no der Hallschent fir d'1:0-Féierung suergen.

An der héchster portugisescher Divisioun huet iwwerdeems Nacional Funchal auswäerts mat 1:2 géint Sporting Braga de Kierzere gezunn. De Vincent Thill souz bei de Gäscht déi 90 Minutten iwwer op der Bänk. Donieft huet Gil Vicente ouni den Tim Hall 1:1 géint CD Tondela gläichgespillt.

An der Ukrain huet de Gerson Rodrigues e Samschdeg e weidere Gol fir Dynamo Kiew markéiert, dat bei der 2:0-Victoire géint Rukh Lviv. De Lëtzebuerger Nationalspiller gouf an der 80. Minutt agewiesselt an huet an der Nospillzäit den zweete Gol fir seng Faarwe markéiert. Lviv ass iwwerdeems mat 1:5 bei Schachtar Donezk ënnert d'Rieder komm. Den Enes Mahmutovic gouf bei Lviv net agewiesselt.