Um Sonndeg konnt sech ënnert anerem de Mica Pinto iwwert eng däitlech 6:0-Victoire vu Sparta Rotterdam géint Den Haag freeën.

An der däitscher Bundesliga séchert sech Mainz, bei deenen de Leandro Barreiro an der Startformatioun stoung an an der Nospillzäit ausgewiesselt gouf, hir éischte Victoire vun der Saison, dëst beim 3:1 géint Freiburg.

An der hollännescher 1. Divisioun konnt sech Sparta Rotterdam mat 6:0 géint Den Haag duerchsetzen. De Mica Pinto stoung hei an der éischter Eelef a gouf no 68 Minutte beim Stand vu 4:0 ausgewiesselt.

An der zweeter belscher Divisioun wënnt den Anthony Moris mat Royale Union St. Gilloise 2:1 géint Molenbeek. De Lëtzebuerger Nationalgolkipp stoung 90 Minutten tëscht de Pottoen.

Fir den Enes Mahmutovic gouf et iwwerdeems eng 1:0-Victoire an der éischter Divisioun an der Ukrain fir Lviv iwwert Desna. De Lëtzebuerger Nationalspiller stoung iwwert déi voll Distanz um Terrain.

Samschdeg

An der 1/8-Finall vun de Playoffs vun der MLS konnt de Maxime Chanot mat sengem Käpper den FC New York City hëllefen, fir op d'mannst an d'Verlängerung ze kommen. City war nämlech fréi zu Orlando a Réckstand geroden an nom 1:1-Ausgläich vum Chanot ass kee weidere Gol méi an der regulärer an an der Verlängerung dono gefall. Esou goung et an d'Eelefmeterschéissen, wou Orlando um Enn mat 6:5 de Gewënner war. Detailer zum kuriéisen Eelefmeterschéisse fannt Dir hei.

Den FK Tambov huet fir de Kont vum 15. Spilldag géint den FK Krasnodar an der russescher Premier League mat 0:1 de Kierzere gezunn. De Sebastien Thill krut bei dësem Match keng Asazzäit an huet de komplette Match iwwer op der Bänk Plaz geholl.

An der 2. Bundesliga ass de Karlsruher SC e Samschdeg op Braunschweig gereest a konnt do eng 3:1-Victoire feieren. An der 68. Spillminutt gouf den Dirk Carlson bei de Gäscht agewiesselt. De Lëtzebuerger Nationalspiller huet an der 75. Minutt déi giel Kaart gewise kritt.

3:3 - dat war d'Resultat an der 3. däitscher Liga am Duell tëscht Saarbrécken a Wiesbaden. Bei der Heemekipp souz de Maurice Deville fir den Ufank vum Match op der Bänk, ma de Lëtzebuerger ass an der 2. Hallschecht an der 71. Spillminutt beim Stand vun 2:3 fir d'Gäscht agewiesselt ginn. Saarbrécken bleift no dësem Gläichspill uewen an der Tabell mat dobäi.

Och ee Punkt krut de Jeff Saibene mat Kaiserslautern auswäerts beim Hallescher FC. D'Rout Däiwelen si fréi an der Partie a Féierung gaangen, kruten an der 2. Hallschecht allerdéngs den 1:1-Ausgläich kasséiert.

De Standard vu Léck war an der ieweschter belscher Liga géint Eupen an der 34. Minutt a Féierung gaangen. D'Ekipp vum Laurent Jans krut nëmmen 2 Minutten drop den 1:1 geschoss a kuerz virun der Paus e Spiller mat Gielrout vum Terrain gesat. An Iwwerzuel huet Eupen kuerz virun der Stonn den 2:1 markéiert, ier de Standard an der 7. Minutt vun der Nospillzäit zu 10 nach den 2:2-Ausgläich gegléckt ass. De Kapitän vun der Lëtzebuerger Nationalekipp souz déi 90 Minutten iwwer op der Bänk. Den Danel Sinani war iwwerdeems mat Waasland-Beveren am Saz. Hie gouf fir d'2. Hallschecht beim Resultat vun 1:0 fir de Cercle Bruges agewiesselt a konnt um Enn och d'0:2-Defaite vu senger Ekipp net verhënneren.

: