Den Newcomer aus Norwegen setzt sech am Eenzel iwwer 20km bei den Hären duerch. Bei den Damme gëtt et eng Victoire fir d'Dorothea Wierer aus Italien.

De Weltcup 2020/21 am Biathlon ass dëse Weekend mam Optakt zu Kontiolahti an d'Saison gestart.

E Samschdeg am Nomëtteg huet Dorothea Wierer aus Italien d'Eenzel-Course bei den Damme gewonnen. D'Italienerin huet sech um Schéissstand kee Feeler erlaabt a gewënnt déi 15km mat engem Virsprong vun nëmmen 9 Honnertstel virum Denise Herrmann aus Däitschland, déi trotz engem Schéissfeeler an der Loipe eng formidabel Lafleeschtung gewisen huet. Mat 24 Sekonne Retard fiert d'Schwedin Johanna Skottheim op déi 3. Plaz.

Um Samschdeg de Moie stoung d‘Eenzel-Course vun de Männer iwwer 20km um Programm. Am finnesche Kontiolahti ka sech den Norweger Sturla Holm Laegreid no 4 feelerfräie Schéissen als Gewënner feiere loossen. Op déi 2. Plaz fiert mat engem Retard vun 19 Sekonnen a 60 Honnertstel de Gesamtweltcup-Gewënner vum leschte Joer Johannes Thingnes Bö. Mat iwwer enger Minutt Retard fiert den däitschen Erik Lesser op déi 3 Plaz um Podium.

Um Sonndeg steet da souwuel bei den Damme wéi och bei den Hären de Sprint um Rendez-vous.