Iwwerdeems gewënnt Manchester City géint Burnley an Atletico Madrid gewënnt knapps mat 1:0 géint Valencia. Paräis spillt nëmmen 2:2 géint Bordeaux.

Um Samschdeg stoungen eng Rei Matcher op internationalem Terrain um Programm. Nieft der englescher Premier League stoungen och Matcher an der däitscher Bundesliga um Spillplang. Dortmund verléiert doheem géint Köln a Stuttgart verlaangt de Bayern alles of. Den Detail vun de Bundesliga-Matcher fannt dir hei.

Premier League

Brighton - FC Liverpool 1:1
0:1 Jota (60'), 1:1 Gross (90+3')

Een éischter schmeechelhaften 0:0 an der Paus fir Liverpool. Den aktuelle Champion hat duerch de Firmino an de Salah wuel 2 déck Chancë gläich um Ufank vum Match, mee Brighton hat an der 1. Hallschent duerch de Connolly, Trossard an e verschossenen Eelefmeter duerch de Maupay och 3 ganz gutt Méiglechkeeten, déi e bësse liichtfäerteg vergi goufen.

An enger Phas wou Brighton déi besser Chancen hat, krut Liverpool duerch de VRA e Gol vum Salah an der 34. Minutt oferkannt.

Nom Téi huet Liverpool d'Zepter awer erëm an d'Hand geholl an esou war et den Diogo Jota deen d'Reds an der 60. Minutt no engem Duebelpass mam Salah a Féierung bruecht huet. Vu Brighton ass an der 2. Hallschent net méi vill komm. An der Nospillzäit krut d'Lokalekipp dunn nom VAR awer deen zweeten Eelefmeter am Match zougesprach. De Pascal Groß huet de Ball an de Filet gesat a fir den 1:1-Gläich gesuergt. Dëst sollt och d'Schlussresultat sinn.

Manchester City - FC Burnley 5:0
1:0 Mahrez (6'), 2:0 Mahrez (22'), 3:0 Mendy (41'), 4:0 Torres (67'), 5:0 Mahrez (69')

Ganz wichteg Victoire fir Manchester City géint eng iwwerfuerdert Ekipp vu Burnley. No Viraarbecht vum De Bruyne huet de Mahrez an der 6. Minutt säin 1. Gol vum Dag geschoss. No 22. Minutte war et den Algerier, dee säin 2. Gol geschoss huet. Virun der Paus war et de Mendy, dee mat engem Schoss aus dem Strofraum de Score nach virun der Paus op 3:0 erop geschrauft huet.

Och nom Säitewiessel war City déi dominant Ekipp an esou konnt d'Ekipp vum Trainer Pep Guardiola mam Torres a Mahrez de Score op 5:0 schrauwen. Deemno eng souverän Victoire fir Manchester City.

FC Everton - Leeds United 0:1
0:1 Ayling (26')

Serie A

Sassuolo Calcio - Inter Mailand 0:3
0:1 Sanchez (4'), 0:2 Chiriches (14'), 0:3 Gagliardini (60')

Am Spëtzematch vun der Serie A huet Inter Mailand vun Ufank u gewisen, dass si dëse Match onbedéngt wollte gewannen an domat Sassuolo an der Tabell géifen iwwerhuelen. Sanches a Chiriches hunn d'Gäscht fréi a Féierung geschoss. Nom Téi huet de Gagliardini an der 60. Minutt fir d'Virentscheedung gesuergt. Inter Mailand gewënnt deemno mat 3:0 an d'Lokalekipp verléiert fir dës Saison eng aller éischte Kéier.

Benevento Calcio - Juventus Turin 1:1
0:1 Morata (21'), 1:1 Letizia (45+3')

Ligue 1

Paris St. Germain - Girondins Bordeaux 2:2
0:1 Pembele (Eegengol, 10'), 1:1 Neymar (27'), 2:1 Kean (28'), 2:2 Adli (60')

No 10 Minutte louch Paräis duerch een Eegegol vum Pembele a Réckstand. Ma bannen 2 Minutten huet de Neymar an de Kean de Match gedréint. An der 2. Hallschent hu sech béid Ekippen näischt geschenkt an hunn allebéid de Wee no vir gesicht. Den de Preville hat an der 86. Minutt eng leschte super Geleeënheet fir d'Gäscht, dës konnt de Bal awer net an de Gol bréngen, sou dass et bei engem gerechten 2:2-Gläich bliwwen ass.

Olympique Marseille - FC Nantes 3:1
1:0 Thauvin (2'), 2:0 Payet (35'), 3:0 Benedetto (60'), 3:1 Blas (73')

La Liga

Real Madrid - Deportivo Alaves 1:2
0:1 Perez (5'), 0:2 Joselu (49'), 1:2 Casemiro (86')

Nom 1:0 vum Perez ass Real lues a lues besser an de Match komm, an hat ënnert anerem kuerz virun der Paus duerch de Kroos eng gutt Chance, de Ausgläich ze markéieren. Nom 0:2 duerch de Joselu ass et awer ëmmer méi schwéier ginn, an ausser dem Uschlossgol sollt um Samschdeg den Owend net méi all ze vill geléngen. Real huet an der 6. Minutt vun der Nospillzäit duerch den Isco wuel nach d'Lat getraff, zum Ausgläich sollt et awer net méi kommen. Den 1:2 doheem géint Deportivo Alaves war schonn's déi 3 Néierlag an dëser Saison fir déi Kinneklech, sou vill wéi an der gesamter leschter Saison.

FC Valencia - Atletico Madrid 0:1
0:1 Lato (Selbstgol, 79')