De Laurent Jans souz beim 2:2-Remis vum Standard 90 Minutten op der Bänk.

Sonndeg

Norrköping huet mam Lars Gerson an der 1. Liga a Schweden eng onglécklech 3:4-Néierlag missen astiechen.

Tëschenzäitlech louch Norrköping mat 2:1 a Féierung. De Gol vum Nyman huet de Lars Gerson virbereet. An enger geckeger 1. Hallschent sinn alleguerten Goler gefall. An der 2. Hallschent sollt awer näischt méi passéieren, sou dass Norrköping mat 3:4 verléiert. D'Championnat ass domadder a Schweden eriwwer. Um Enn kënnt Norrköping op déi 6. Plaz an der Tabell a verpasst domadder d'Europa League.

De Laurent Jans ass beim 2:2-Remis vum Standard Léck géint KV Mechelen net zum Asaz komm an huet missen déi 90 Minutten op der Bank Plaz huelen. Léck bleift nom Gläichspill op der 5. Plaz an der Tabell.

D'Young Boys Bern hunn an der Schwäiz ouni de Christopher Martins, dee weiderhi blesséiert ass, mat 3:2 géint Luzern gewonnen. Bern louch tëschenzäitlech schonn no 27 Minutte mat 3:0 a Féierung. No der Paus ass et nach eng Kéier spannend ginn, ma et sollt awer duergoen, fir de Virsprong iwwert d'Zäit ze bréngen.

An der franséischer Ligue 1 huet den OSC Lille mam President Gérard Lopez Monaco mat 2:1 geklappt. Do dëser wichteger Victoire befënnt sech Lille aktuell op der 2. Plaz an der Tabell, dat mat engem Retard vun 2 Punkten op Paris St. Germain.

De Vahid Selimovic stoung wuel am Kader bei der 0:2-Defaite vu Kreta géint Smyrnis, zum Asaz sollt de Lëtzebuerger awer net kommen. No 11 Spilldeeg steet Kreta op der 9. Plaz mat 12 Punkten.

A Portugal hat um Sonndeg de Mëtteg Vilafranquense, déi ouni den 23 Joer alen Eric Veiga aus Lëtzebuerg ugetruede sinn, Besuch vun Estoril Praia. No engem Gol an der 50. Minutt vum Gambola verléiert Vilafranquense doheem mat 0:1.

An der Primeira Liga ass de Vincent Thill bei der 1:3-Defaite vu Nacional géint Santa Clara net zum Asaz komm an huet missen 90 Minutten op der Bänk sëtzen.

Samschdeg

Fir den FK Tambow ass et an der russescher Liga eng kloer 1:5-Defaite géint Spartak Moskau ginn. De Sebastien Thill stoung dobäi iwwer 90 Minutten um Terrain.

An der Ukrain war den Enes Mahmutovic mam FC Lwiw beim 1:1 géint Inhulets de ganze Match am Asaz. Dobäi gouf et fir d'Lokalekipp vu Lwiw zwou Rout Kaarten, um Enn stoung awer de wichtege Remis.

Owes konnt sech Dynamo Kiew dann nach am Match géint Mariupol mat 2:1 duerchsetzen. De Gerson Rodrigues ass an der 89. Minutt op den Terrain komm.

De Jeff Saibene huet e Samschdeg an der 3. Liga eng weider Kéier mat senge Spiller gläichgespillt. Duerch zwee spéit Goler an der 89. an der 90. Minutt stoung um Enn fir Kaiserslautern en 2:2 géint den MSV Duisburg.

Parallel war de Maurice Deville am Match géint säin Ex-Veräin an der 63. Minutt agewiesselt ginn. Um Enn stoung fir den 1. FC Saarbrécken awer eng kloer 1:4-Defaite zu Mannheim.

An der 2. Bundesliga ass et fir Karlsruhe eng 2:1-Victoire géint de VfL Osnabrück ginn. Den Dirk Carlson ass dobäi net an den Asaz komm.

Waasland-Beveren huet sech an der Jupiler League géint Mouscron mat 2:0 duerchgesat, dobäi war den Danel Sinani awer de ganze Match op der Bänk.

An der zweeter Divisioun an der Belsch huet Royale Union St. Gilloise Lierse mat 5:0 iwwerrannt. Den Anthony Moris stoung bei der Lokalformatioun wéi gewinnt tëscht de Pottoen.

Freideg

Doheem hat den aktuell Néngten aus Rotterdam et mam Leschten aus Emmen ze dinn. D'Heemekipp ass duerch den Duarte no 22 Minutten a Féierung gaangen, ma kuerz nom Säitewiessel huet de Araujo ausgeglach. Den Ausgläich war awer net vu laanger dauer, well an der 58. Minutt, 6 Minutte méi spéit also, huet den Harroui Rotterdam nees a Féierung bruecht. Et sollt kee Gol méi falen, esou datt d'Ekipp vum Mica Pinto wënnt an elo mat 12 Punkten aus 11 Matcher op der 9 Plaz steet.