E Samschdeg de Mëtteg war et an der däitscher Bundesliga d'Suite vum 10. Spilldag.

Fir de Leandro Barreiro, dee vun Ufank u gespillt huet, ass et eng 1:2-Defaite zu Bielefeld ginn, Freiburg a Gladbach spillen 2:2 gläich an och bei Köln-Wolfsburg a Frankfurt-Dortmund ass et kee Gewënner ginn. Am Owesmatch ass et tëscht Bayern a Leipzig an engem opreegende Match en 3:3 ginn.

10. Spilldag vun der Futtball-Bundesliga

Bayern - Leipzig 3:3
0:1 Nkunku (19'), 1:1 Musiala (30'), 2:1 Müller (35'), 2:2 Kluivert (36'), 2:3 Forsberg (48'), 3:3 Müller (75')

Am Duell ëm déi éischt Plaz an der Tabell wollte béid Ekippen déi dräi Punkte fir sech behaapten, wat een och vun Ufank un um Terrain gesinn huet. Bayern a Leipzig hu sech op Aenhéicht gewisen, ma an der 19. Minutt ass de Gaascht mat 1:0 a Féierung gaangen. Den Neuer wollt den Nkunku op Strofraum-Héicht stéieren, deen huet de Golkipp vun de Bayern awer gekonnt ausgespillt a sou de Ball an den eidele Gol geschoss. No 25 Minutten misst dann de Javi Martinez verletzungsbedéngt vum Terrain, dee vum jonke Jamal Musiala ersat ginn ass. A genau dee war et, deen nëmme 5 Minutte méi spéit mat engem prezise Schoss aus 17 Meter ausgläiche konnt. Nom 1:1 huet Bayern weider Drock gemaach a sou konnt de Müller kuerz drop op 2:1 fir de Rekordmeeschter stellen. De Match sollt awer einfach net zur Rou fanne, wéi just eng Minutt méi spéit dem Kluivert de Gol zum 2:2 gelongen ass. Eng opreegend éischt Hallschent ass sou no interessante 45 Minutten op en Enn gaangen.

Den zweeten Duerchgang ass genau sou weidergaange wéi den Éischten opgehalen huet. No enger Flank vum Angelino huet de Forsberg dem Golkipp mat engem Kappball keng Chance gelooss a sou louch Leipzig nees a Féierung. Bayern war elo gefuerdert, ma de Match huet sech e bësse berouegt well d'Gäscht elo och hanne besser stoungen. Bayern huet awer nach net opginn, weider Drock gemaach a sou war et an der 75. Minutt de Müller dee mam Kapp eng weider kéier zum 3:3 ausgläiche konnt. No enger oppener Schlussphas, an där béid Ekippen nach de Gol zur Victoire schéisse konnten, ass et dann awer beim 3:3 bliwwen a sou deele sech Bayern a Leipzig d'Punkten.

Frankfurt - Dortmund 1:1
1:0 Kamada (9'), 1:1 Reyna (56')

Ufanks huet Frankfurt de Gaascht ulafe gelooss a sech op déi defensiv Aarbecht konzentréiert. No net mol 10 Minutten ass dann den éischte Gol fir d'Hauhsäre gefall, wéi de Kamada eng laang Pass vum Hinteregger verwäerte konnt. D'Dortmunder Ekipp, déi ouni de verletzten Haaland an de Match gaangen ass, war elo gefuerdert. Eng gutt Äntwert hu sie awer bis zur Paus net méi fonnt.

Nom Säitewiessel hunn déi Giel da méi oft de Wee virun de géigneresche Gol fonnt a sou huet et net all ze laang gedauert bis den 1:1 gefall ass. An der 56. Minutt konnt de Reyna mat engem stramme Schoss an de Wénkel ausgläichen. Nom Gol huet Dortmund de Match bestëmmt an d'Lokalekipp krut sech nëmme schwéier befräit. Um Enn bleift et awer beim 1:1 a sou deele sech béid Ekippen zu Frankfurt d'Punkten.

Bielefeld - Mainz 2:1
1:0 Prietl (21'), 2:0 Doan (31'), 2:1 Stöger (82')

Eng weider kéier stoung de Leandro Barreiro an der Mainzer Starteelef. Am Kellerduell hu sech béid Ekippe vun Ufank un engagéiert gewisen a sou hu sech d'Haushären no ronn 20 Minutte belount. De Prietl hat aus der Distanz ofgezunn, ma de Ball ass duerch e Mainzer Spiller onhaltbar ofgefälscht ginn. 10 Minutte méi spéit ass et no engem Ballverloscht vum Barreiro séier gaangen a sou war et den Doan, deen op 2:0 erhéije konnt.

Am zweeten Duerchgang huet sech Bielefeld méi op d'Defense konzentréiert, Mainz konnt awer bis zu ronn 10 Minutte viru Schluss net vill doraus maachen. An der 82. Minutt ass dem Stöger nach den Uschlossgol zum 1:2 gelongen, ma fir e weidere Gol sollt et net méi duergoen a sou geléngt et Bielefeld um Enn déi dräi Punkte fir sech ze halen.

Freiburg - Gladbach 2:2
0:1 Embolo (23'), 1:1 Santamaria (32'), 2:1 Grifo (49'), 2:2 Plea (50')

D'Ekipp aus dem Breisgau ass vun Ufank u fréi gestéiert an ënner Drock gesat ginn. Och wa Gladbach an den éischte Minutte méi vum Match hat, huet Freiburg gutt dergéint gehalen an net vill zougelooss. An der 23. Minutt sinn d'Gäscht no engem gudden Zesummespill dann awer a Féierung gaangen. No enger Pass vum Stindl konnt den Embolo mat engem flaache Schoss de Gol zum 1:0 fir d'Fohlen markéieren. D'Haushären hunn awer net opginn a sou ass et duerch e Corner zum Ausgläich komm, wéi de Lienhart no engem Fallrückzieher vum Santamaria mam Kapp op der richteger Plaz war.

No der Paus ass Freiburg dann a Féierung gaangen, wéi de Grifo vum Eelefmeterpunkt d'Nerve behalen huet. Den 2:1 sollt awer net all ze laang bestoe bleiwe, wéi just eng Minutt méi spéit den 2:2 gefall ass. De Plea huet aus ronn 20 Meter mat engem schéine Schoss ausgeglach a sou nees d'Partie opgemaach. Um Enn ass et awer bei deem Spillstand bliwwen a sou deele sech Freiburg a Gladbach an engem ausgeglachene Match d'Punkten.

Köln - Wolfsburg 2:2
1:0 Thielmann (18'), 1:1 Arnold (29'), 2:1 Duda (43')

No enger gudder Véierelstonn, an där Wolfsburg liicht d'Nues vir hat, konnt Köln iwwerraschend duerch e Gol vum Thielmann a Féierung goen. Mat engem flaache Schoss an den Eck konnt den 18-Joer-ale Kölner säin éischte Bundesliga-Gol markéieren. Ronn 10 Minutten drop ass Wolfsburg dann awer schonn den Ausgläich gefall, wéi den Arnold aus enger gudder Positioun per Fräistouss treffe konnt. Nom 1:1 huet sech de Match dann e bëssen neutraliséiert a kuerz virun der Paus ass Köln dann nees a Féierung gaangen. No enger Flank vum Rexhbecaj huet den Duda dem Golkipp mat engem stramme Schoss ënnert d'Lat keng Chance gelooss a sou ass et fir d'Lokalekipp mat engem 2:1 an d'Paus gaangen.

2 Minutten nom Säitewiessel ass duerch de Weghorst dann op 2:2 gestallt ginn. De Wolfsburger Stiermer stoung mam Kapp op der richteger Plaz a konnt sou aus 5 Meter ausgläichen. Am weidere Spillverlaf hat d'Ekipp vu Wolfsburg méi vum Match, konnt mam Ballbesëtz awer net sou richteg eppes ufänken. Bis zum Schluss ass kengem méi e weidere Gol gelongen a sou bleift et beim 2:2 an der Partie zu Köln.

Klickt hei, fir op d'Säit mat all de Resultater ze kommen.