Aus dem Lëtzebuerger Duell e Méindeg den Owend am belsche Championnat tëscht dem Standard Léck a Waasland-Beveren ass näischt ginn.

Beim Standard vu Léck stoung de Laurent Jans e Méindeg den Owend nämlech net am Kader. D'Ekipp huet sech um Enn mat 3:1 géint Waasland-Beveren mam Danel Sinani behaapt. Den 23 Joer ale Lëtzebuerg gouf an der 63. Minutt fir de Khammas agewiesselt.

Duerch d'Victoire steet Léck elo op der 10. Plaz an der Tabell. Sinani a Co stinn als 16. kuerz virun den Ofstigsplazen.

Aus der 2. Bundesliga ass et iwwerdeems d'Nouvelle, datt den Dirk Carlson op d'mannst 3 bis 4 Wochen dem Karlsruher SC wéinst Réckeproblemer net zur Verfügung steet. E Freideg hat de Lëtzebuerger bei der 3:2-Victoire géint Greuther Fürth net gespillt, hie war wéinst enger Giel-Rouder-Kaart gespaart.

Sonndeg

An Holland huet Sparta Rotterdam den Derby mat 0:2 géint Feyernoord Rotterdam verluer. Bei Sparta huet de Lëtzebuerger Nationalspiller Mica Pinto déi 90 Minutten duerchgespillt.

An der éischter Griichescher Liga ass de Vahid Selimovic mat OFI op Atromitos getraff an hu sech mat 0:0 getrennt. De lëtzebuergesche Nationalspiller gouf an der Paus ausgewiesselt.

An der zweeter Liga a Portugal stoung sech Casa Pia mam Marvin Martins an Arouca géintiwwer an deele sech d'Punkte mat engem 1:1. De Lëtzebuerger stoung de ganze Match als Rietsverdeedeger um Terrain.

An der éischter Divisioun a Portugal verléiert Gil Vicente mat 1:3 zu Farense. Den Tim Hall stoung net am Kader.

Samschdeg

Um 15. Spilldag an der Bundesliga huet Mainz mat 0:2 géint Frankfurt de Kierzere gezunn. De Leandro Barreiro stoung déi 90 Minutten iwwer fir déi Mainzer um Terrain. De Veräi vum Lëtzebuerger Nationalspiller steet mat 6 Punkten op der leschter Plaz an der Tabell.

An der 3. Bundesliga ass et fir de Jeff Saibene an den 1. FC Kaiserslautern um Betzenberg géint Viktoria Köln gaangen. Um Enn trenne sech béid Ekippe mat engem 0:0.

De Maurice Deville stoung an der 3. däitscher Liga wéinst enger Blessur e Samschdeg net am Kader. Am Match géint den SV Meppen ass et fir den 1. FC Saarbrécken eng 0:1-Defaite ginn.

Freideg

Och d'Ekipp vum Vincent Thill konnt um 13. Spilldag a Portugal fir keng Néierlag beim Leader Sporting Lissabon suergen. E Freideg huet d'Heemekipp mat 0:2 géint d'Gäscht verluer. Sporting steet an der Tabell op der éischter Plaz an huet 4 Punkte Virsprong op den FC Porto a Benfica Lissabon.

Den Thill souz beim Match déi 90 Minutten iwwer op der Bänk. An der Tabell läit Nacional op der 9. Plaz mat 13 Punkten, allerdéngs sinn d'Relegatiounsplaz an d'Ofstigsplazen nëmmen zwee Punkte fort.