An der Premier League iwwerhëlt iwwerdeems Manchester United d'Tabellespëtzt.

Am éischte vun zwee Nodrosmatcher huet Bayer 04 Leverkusen en Dënschdeg misse géint Eintracht Frankfurt untrieden an de Match kloer fir sech entscheet.

De Frankfurter Younes huet an der 6. Minutt no enger Pass vu riets vum Silva den 1:0 geschoss. Den Alario konnt an der 27. Minutt duerch en Eelefmeter fir Leverkusen ausgläichen. No Giel an der 42. Minutt fir den Hinterregger (Frankfurt) ass et an d'Paus gaangen.

Nëmmen 4 Minutten nodeems déi 2. Hallschent ugepaff gouf, konnt den Tapsoba de Ball erakäppen a markéiert den 2:1 fir Leverkusen. An der 61. Minutt ass et fir hien eng giel Kaart no engem Foul um Illsanker. E Ballverloscht an der 67. Minutt huet den Amiri ausgenotzt mat enger Pass un den Diaby, deen dunn den 3:1 geschoss huet. Och eng rout Kaart fir den Tah (Leverkusen) an der 73. Minutt huet d'Saach net méi gerett fir Frankfurt. Mam 4:1 an der 87. Minutt vum Diaby war et um Enn decidéiert.

Leverkusen muss an der 1/8-Finall géint de Regionalligist Rot-Weiß Essen untrieden. Bayern München ass e Mëttwoch nach op Besuch bei Holstein Kiel.

D'Matcher vun der 1/8-Finall ginn den 2. an 3. Februar gespillt.

Premier League

Fir de Kont vum 17. Spilldag an der Premier League huet en Dënschdeg den Owend Manchester United auswäerts géint Burnley gespillt. E Gol vum Pogba an der 71. Minutt ass de Red Devils duergaangen, fir déi 3 Punkte mat Heem ze huelen. Machester United huet an dëser Saison nach keen Auswäertsmatch verluer. Duerch dës Victoire iwwerhëlt d'Ekipp vum Solskjaer d'Féierung an der Tabell a geet e Sonndeg mat engem Virsprong vun dräi Punkten an den Derby géint Liverpool.

Klickt hei, fir op den Iwwerbléck mat de Resultater vun der Premier League ze kommen.

La Liga

Am spuenesche Championnat war en Dënschdeg den Owend een Nodrosmatch vum 1. Spilldag. De Leader Atlético Madrid huet sech mat 2:0 géint den FC Sevilla behaapt. D'Goler hunn de Correa an der 17. Minutt an de Saul an der 76. Minutt geschoss.

No dëser Victoire huet Atlético Madrid e Virsprong vu 4 Punkten op Real Madrid.

Klickt hei, fir op den Iwwerbléck mat de Resultater vun der La Liga ze kommen.