Am hollännesche Futtball-Championnat huet ee sech e Mëttwoch den Owend mat 1:0 bei Fortuna Sittard behaapt.

An der ieweschter Divisioun am hollännesche Championnat war et e Mëttwoch den Owend een erfollegräichen Owend fir de Mica Pinto. De Lëtzebuerger Nationalspiller huet mat sengem Veräin fir de Kont vum 16. Spilldag mat 1:0 bei Fortuna Sittard gewonnen. De Pinot stoung an der Startformatioun a gouf an der 69. Minutt ausgewiesselt.

Sparta Rotterdam steet an der Tabell op der 8. Plaz an huet 6 Punkte Retard op déi international Plazen.

Dënschdeg

A Portugal war et en Dënschdeg den Owend den Optakt vun den Aachtelsfinalle vun der Coupe. Mam Vincent Thill war ee Lëtzebuerger am Asaz.

Den FLF-Nationalspiller war mat senger Ekipp Nacional Funchal géint den FC Porto gefuerdert. No 90 Minutte stoung et tëscht béiden Ekippen 2:2 gläich, sou datt de Match an d'Verlängerung gaangen ass. Hei hat de Favorit Porto de méi laangen Otem an huet sech um Enn mat 4:2 behaapt.

De Vincent Thill gouf bei Nacional Funchal an der 105. Minutt agewiesselt an huet an der 119. Minutt een Eelefmeter verschoss.