Paris Saint-Germain steet duerch dës Victoire op d'mannst fir een Dag un der Spëtzt vun der Tabell an der Ligue 1.

Um Sonndeg gouf net nëmmen an der Bundesliga Futtball gespillt, ma och an England, Frankräich an Italien waren d'Veräiner aus der ieweschter Divisioun am Asaz.

Ligue 1

Angers 0:1 PSG
0:1 Kurzawa (70')

Dräi Deeg no der Victoire vum franséische Super Cup war Paris Saint-Germain zu Angers gefuerdert - an hat dobäi déi éischte Plaz an der Ligue-1Tabell am Bléck. Um Enn konnt een dës och duerch eng 1:0-Victoire op d'mannst fir een Dag erueweren.

Vum Numm hier hätt de Match eng kloer Saach fir Paräis misse sinn, ma dat war net de Fall. Angers huet gutt verteidegt, huet d'Raim zougestallt an huet och dovunner profitéiert, datt de PSG no vir dacks ze vill Feeler gemaach huet an doduerch kaum Gefor entwéckele konnt. Insgesamt hat den éischte schwaachen Duerchgang kaum Héichpunkten ze bidden, sou datt et mat engem 0:0 an d'Kabinne gaangen ass.

An den zweete 45 Minutten war et gréisstendeels dat nämmlecht Bild. Paräis war optesch iwwerleeën, mat vill méi Ballbesëtz, ma kloer Chancë gouf et kaum. Angers huet sech op d'Defense konzentréiert an huet et déi eng oder aner Kéier mat engem Konter probéiert. Gréisstendeels huet sech de Match allerdéngs tëscht de Strofraim opgespillt. Um Enn huet e Feeler vun Angers d'Entscheedung bruecht. No enger Flank vum Florenzis ass dem Thomas säi Rettungsversuch komplett gescheitert, de Kurzawa huet sech net zweemol biede gelooss an huet den decisiven 1:0 fir de PSG an der 70. Minutt geschoss.

Marseille 1:2 Nimes
0:1 Eliasson (55'), 0:2 Eliasson (58'), 1:2 Benedetto (85')

Marseille hat géint déi am Tabellekeller placéierte Männer aus Nimes déi dräi Punkte fest ageplangt, fir sech op eng Europaleague-Plaz ze verbesseren. Si haten och ee klore Plus u Ballbesëtz, allerdéngs konnte si de Score net opmaachen. An der 35. Minutt hat den Thauvin déi gréisste Geleeënheet aus eelef Meter, ma hie konnt awer net markéieren. No der Paus hat de Mann vum Match de Eliasson innerhalb vun nëmmen 3 Minutten direkt 2 mol konnte markéieren. Marseille konnt an der 85. Minutt nach eng Kéier den Uschloss markéieren, ma dat sollt um Enn awer net duergoen. Soumat konnt Nimes 3 wichteg Punkten an der Lutte em de Maintien afueren a sech op déi drëttleschte Positioun verbesseren.

Premier League

Fulham 0:1 Chelsea
0:1 Mount (78')

Chelsea war auswäerts vun Ufank un den Här am Haus. Si haten ee klore Plus u Ballbesëtz an u Golgeleeënheeten an no der rouder Kaart vum Robinson an der 44. Minutt konnt Chelsea seng Iwwerleeënheet weider ausbauen, ouni allerdéngs ze markéieren. Et huet bis déi 78. Minutt gedauert, éiert dee jonke Mason Mount d'"Blues" erléise konnt an de Gol vum Match markéiert huet. Duerch dës Victoire verkierzt Chelsea de Réckstand op déi europäesch Plazen.

Wolverhampton 2:3 West Brom

0:1 Pereira, Eelefmeter (8'), 1:1 Silva (38'), 2:1 Boly (43'), 2:2 Ajayi (52'), 2:3 Pereira, Eelefmeter (56')

Fir West Brom gouf et wichteg 3 Punkten an der Lutte ëm de Maintien an der Premier League. Nodeems de Pereira fréi no 8 Minutten aus Eelefmeter fir d'Féierung gesuergt huet, ass et der Lokalekipp gelongen, de Match nach an der éischter Hallschent ze dréinen. De Silva konnt den tëschenzäitlechen Ausgläich markéieren, éiert de Boly d'"Wolves" an der 43. Minutt esouguer a Féierung brénge konnt. Nom Téi konnt den Ajayi op 2:2 stellen, éiert de Mann vum Match, de Pereira, säin 2. Eelefmeter verwandele konnt. No dëser Victoire steet West Brom weiderhin op der zweetleschter Plaz, si konnte sech allerdéngs e bësse Loft verschafen.

Leeds 0:1 Brighton
0:1 Maupay (17')

West Ham 1:0 Burnley
1:0 Antonio (9')

Leicester 2:0 Southampton
1:0 Maddison (37'), 2:0 Albrighton (45')

Serie A

Bologna 1:0 Verona
1:0 Orsolini (19')

An der italienescher Serie A konnt sech Bologna iwwerdeems weider vun den ënneschte Plazen ofsetzen. Bei der knapper 1:0-Victoire géint Verona war et den Orsolini, deen de Gol vum Dag markéiere konnt.

FC Turin 0:0 Spezia