An England gouf et am Spëtzematch tëscht Liverpool a ManUnited een 0:0. Bilbao huet de Super Cup géint Barcelona gewonnen.

Bundesliga

Bayern München - SC Freiburg 2:1
1:0 Lewandowski (9'), 1:1 Petersen (65'), 2:1 Müller (74')

Nom iwwerraschenden Out vu Bayern München an der zweeter Ronn vum DFB-Pokal e Mëttwoch den Owend géint Holstein Kiel aus der 2. Bundesliga war den FCB e Sonndeg fir de Kont vum 16. Spilldag an der Bundesliga géint den SC Freiburg gefuerdert. Um Enn hu sech déi Münchner knapp mat 2:1 duerch Goler vum Lewandowski a Müller behaapt a sinn Hierschtmeeschter.

De Lewandowski huet iwwerdeems een neie Rekord an der Hironn realiséiert. Fir de Pol war et den 21. Gol an dëser Saison. Hien ass domadder elo besser wéi de Gerd Müller, deen an der Saison 1968/69 20 Mol getraff hat.

Freiburg hat ee ganz schlecht Start erwëscht. Schonn an der 5. Minutt huet sech de Santamaria ouni Friemawierkung blesséiert an huet missen ausgewiesselt ginn. Fir hie koum den Abrashi op den Terrain. Kuerz drop huet et eng éischte Kéier am Gol vun de Gäscht gerabbelt. De Lewandowski huet den däitsche Rekordchampion an der 9. Minutt mat 1:0 a Féierung bruecht. D'Breisgauer hu sech vun der Blessur an dem Réckstand allerdéngs net wierklech beandrockt gewisen, villméi hu si déi éischt Hallschent duerchaus oppe gestallt an haten och déi eng oder aner Chance. An den éischte 45 Minutten haten déi Münchner awer e Chancëplus a louchen an engem net oninteressante Match ënnert dem Stréch verdéngt mat 1:0 a Féierung.

An der zweeter Hallschent ass d'Intensitéit an d'Aggressivitéit am Match eropgaangen. An der 65. Minutt dunn de Schock fir d'Ekipp vum Flick. Nëmme Sekonnen no senger Awiesslung huet de Petersen mat engem Kappball op 1:1 gesat. Nom Ausgläich huet Bayern den Tempo däitlech erhéicht an esou konnt een duerch e Gol vum Müller an der 74. Minutt nees mat 2:1 a Féierung goen. D'Ekipp vum Streich wollt sech mat der Néierlag net zefridde ginn an huet fréi attackéiert. An der Nospillzäit hat een nach eng ganz gutt Chance fir den Ausgläich, ma de Schoss vum Petersen ass um Aluminium hänke bliwwen. Um Enn ass kee Gol méi gefall an den FCB konnt den 2:1 iwwert d'Zäit bréngen.

D'Bayern notzen domadder d'Remisë vu Leipzig an Dortmund an d'Néierlag vu Leverkusen fir de Virsprong un der Tabellespëtzt weider auszebauen.

Eintracht Frankfurt - Schalke 04 3:1
1:0 Silva (28'), 1:1 Hoppe (29'), 2:1 Jovic (72'), 3:1 Jovic (90+2')

De Mann vum Match war e Sonndeg bei der 3:1–Victoire vu Frankfurt géint Schalke de Jovic. Eréischt e Mëttwoch war hien aus Madrid ukomm an huet direkt mat zwee Goler d’Victoire geséchert. De Jovic gouf vu Real ausgeléint. Frankfurt steet mat 26 Punkten op der 7. Plaz an der Tabell. Schalke bleift op der leschter Plaz. Si hu genee wéi Mainz 7 Punkten um Kont.

Premier League

Sheffield United - Tottenham Hotspur 1:3
0:1 Aurier (5'), 0:2 Kane (40'), 1:2 McGoldrick (59'), 1:3 Ndombele (62')

Liverpool - Manchester United 0:0

No 90 intensive Minutten ass de Spëtzematch e Sonndeg an der Premier League tëscht Liverpool a Manchester United ouni Goler op en Enn gaangen. Liverpool ass domadder zanter 4 Matcher ouni Victoire. An der Tabell bleift Manchester United mat 37 Punkte un der Tabellespëtzt. Op Plaz 2 an 3 Manchester City a Leicester City mat 35 Punkten a Liverpool ass Véierte mat 34 Punkten.

Den FC Liverpool huet vun Ufank un am Match géint Manchester United d'Kontroll iwwerholl an hat an der éischter Hallschent deels 70 Prozent Ballbesëtz. Virum Gol vun de Gäscht huet et awer un der néideger Gefor an dem leschte Pass gefeelt, sou datt d'Ekipp vum Solskjær grouss Golchancë vum Rival gréisstendeels verhënnere konnt. Fir déi gréisst Chance huet de Fernandes mat engem Fräistouss an der 34. Minutt gesuergt. E Gol sollt de Red Devils awer net geléngen, sou datt et mat engem 0:0 an d'Paus gaangen ass.

An der zweeter Hallschent huet d'Ekipp vum Klopp direkt nees d'Fiedem an d'Hand geholl an huet no engem Lach an der kompakter Defense vun de Gäscht gesicht. Wierklech geféierlech Golchancë gouf et an der Ufanksphas net. An de lescht 15 Minutten ass et dunn awer richteg intensiv ginn. Et ass hin an hier gaangen an et gouf op béide Säite gutt Chancen. Kenger Ekipp sollt an den 90 Minutten awer kee Gol geléngen, sou datt de Match mat engem 0:0-Remis op en Enn gaangen ass.

Manchester City - Crystal Palace 4:0
1:0 Stones (26'), 2:0 Gündogan (56'), 3:0 Stones (68'), 4:0 Sterling (88')

Souverän huet Manchester City seng Partie géint Crystal Palace gewonnen. Duerch de 4:0 bleift ee vir an der Tabell mat dobäi. Aktuell steet ManCity op der 2. Plaz, dat mat engem Retard vun 2 Punkten op de Leader.

Virun net all ze laanger Zäit huet et bei der Ekipp nach däitlech manner gutt ausgesinn. Viru ronn zwee Méint stoung de sechsfache Champion nach op der 13. Plaz an hat schonn 8 Punkte Retard. No engem richteg gudde Laf an de leschte Partië gesäit d'Welt Mëtt Januar nees ganz anescht aus.

Serie A

SSC Neapel - AC Florenz 6:0
1:0 Insigne (5'), 2:0 Demme (36'), 3:0 Lozano (38'), 4:0 Zielinski (45'), 5:0 Insigne (72., Eelefmeter), 6:0 Politano (89')

Keng Chance huet e Sonndeg um 18. Spilldag an der Serie A den SSC Neapel dem AC Florenz gelooss. Mat 6:0 huet een de Match um Enn kloer dominéiert. An der Paus stoung et schonn 3:0. Och an den zweete 45 Minutten huet Neapel de Match souverän op en Enn gespillt an huet dräi weider Kéiere markéiert. Duerch dës Victoire bleift d'Ekipp vum Gattuso ënnert deene beschten Ekippen am italienesche Championnat.

© AFP

Inter Mailand - Juventus Turin 2:0
1:0 Vidal (12'), 2:0 Barella (52')

Fir Juventus Turin gouf et e Sonndeg den Owend e weidere Réckschlag am Championnat. Mat 2:0 huet ee sech misse géint Inter Mailand geschloe ginn. Duerch dës Defaite huet een elo scho 7 Punkte Retard op den AC Mailand an Inter Mailand, déi mat 40 Punkten op den zwou éischte Plazen an der Tabell leien.

Ligue 1

OSC Lille - Stade Reims 2:1
0:1 Zeneli (36'), 1:1 Bamba (48'), 2:1 David (90+1')

Um 20. Spilldag am franséische Championnat huet Lille in extremis mat 2:1 géint Stade Reims gewonnen. Nodeems d'Gäscht an der 36. Minutt duerch e Gol vum Zeneli a Féierung gaange waren, huet de Bamba fir Lille kuerz no der Paus ausgeglach. Sekonne viru Schluss ass dunn dem David nach den decisive Gol gegléckt, sou datt Lille sech nach mat 2:1 behaapte konnt. An der Tabell ass een domadder weider punktgläich mam Champion PSG.

Stade Brest - Stade Rennes 1:2
1:0 Honorat (4'), 1:1 Bourigeaud (7'), 1:2 Grenier (77', Eelefmeter)

Olympique Lyon - FC Metz 0:1
0:1 Leya (90')

Tëscht Olympique Lyon a Metz huet et laang no engem 0:0-Remis ausgesinn, ma a leschter Sekonn hu sech d'Gäscht nach déi dräi Punkte gekroopt. An der 90. Minutt huet de Leya den decisive Gol markéiert. Duerch dës Néierlag verléiert d'Lokalekipp an der Ligue 1 d'Tabellespëtzt an ass op déi drëtte Plaz zeréckgefall. Mat 42 Punkte stinn de PSG a Lille op de Plazen eent an zwee. Lyon huet zwee Punkte manner um Kont. Metz steet no dësem Exploit op der gudder 9. Plaz mat 28 Punkten.

De Resümmee vum Match fannt Dir bei de Kolleege vum 5minutes.

Spuenesche Super Cup

FC Barcelona - Athletic Bilbao 2:3
1:0 Griezmann (40'), 1:1 de Marcos (42'), 2:1 Griezmann (77'), 2:2 Villalibre (90'), 2:3 Williams (93')

Bilbao ass an der Finall vum spuenesche Super Cup eng weider Iwwerraschung gegléckt. Nodeems een an den Halleffinalle Real Madrid eliminéiert hat, huet ee sech an der Finall no Verlängerung mat 3:2 géint Barcelona duerchgesat.

Fir Barca war et een Owend fir ze vergiessen. D'Katalane waren zweemol a Féierung ma konnten den Avantage net iwwert d'Zäit bréngen. De Messi huet an der Nospillzäit vun der Verlängerung och nach déi rout Kaart gesinn. No 1984 an 2015 ka sech Bilbao fir déi drëtte Kéier iwwert d'Victoire am Super Cup freeën.