E Sonndeg stoung beim Biathlon-Weltcup zu Oberhof an Däitschland nach ee Massestart bei den Hären an den Dammen um Programm.

No 15 Kilometer a 4 Mol Schéisse konnt sech bei den Hären den Tarjei Bö (1 Feeler) iwwert d'Victoire freeën. Den Norweger huet sech virum Felix Leitner (0 Feeler) aus Éisträich an dem Benjamin Weger (0 Feeler) aus der Schwäiz behaapt.

D'Decisioun ëm d'Victoire ass e Sonndeg beim Massestart wärend dem leschte Schéisse gefall. Bis dohinner war an der Loipe e Spëtzegrupp mat sechs feelerfräie Biathleten ënnerwee. Nieft dem Däitschen Erik Lesser hunn och den Norweger Tarjei Bö an de Russ Matwej Jelissejew ee Feeler geschoss. Feelerfräi sinn nëmmen de Schwäizer Benjamin Weger an d'Éisträicher Simon Eder a Felix Leitner bliwwen.

Wärend de Bö, nom leschte Schéisse knapp néng Sekonnen hannert dem Spëtzentrio, no vir gestiermt ass a séier op déi éischt Biathleten nees opgeschloss huet, ass dat dem Lesser an dem Jelissejew net gegléckt.

Un der Spëtzt ass um Enn d'Decisioun am leschte Bierg gefall: De Bö huet sech ofgesat a mat enger Avance vun 3,6 Sekonne virum Leitner gewonnen. Op de Podium huet et nach de Weger mat engem Retard vu 7,8 Sekonne gepackt.

De Leader am Gesamtweltcup Johannes Thingnes Bö huet sech misse mat der 7. Plaz zefridde ginn. Hien huet e Sonndeg direkt véier Mol missen an d'Strofronn.

Bei den Dammen ass e Sonndeg am Nomëtteg d'Victoire un d'Julia Simon gaangen. D'Franséisin huet sech op de leschte Metere géint d'Franziska Preuß aus Däitschland behaapt. Béid Athletinne sinn an der Course ouni Feeler bliwwen. No den 12,5 Kilometer am Massestart ass d'Hanna Oeberg aus Schweden déi Drëtt ginn.

Bis dat lescht Schéissen hat et nach no enger iwwerleeëner Victoire vum Dorothea Wierer ausgesinn. D'Italienerin koum feelerfräi bei dat lescht Schéissen. Hei huet sech déi 30 Joer al Biathletin allerdéngs zwee Feeler geleescht an huet domadder hir 13. Weltcup-Victoire wéi och déi éischt Victorie zu Oberhof kloer verpasst. Um Enn ass déi zweefach Weltcup-Gewënnerin nëmmen déi Sechst ginn.

Top 10

Hären

1 Tarjei Bö Flagge Norwegen 0+0+0+1 37:41,9
2 Felix Leitner Flagge Österreich 0+0+0+0 + 3,6
3 Benjamin Weger Flagge Schweiz 0+0+0+0 + 7,8
4 Lukas Hofer Flagge Italien 0+1+1+0 + 12,5
5 Simon Eder Flagge Österreich 0+0+0+0 + 12,7
6 Matwej Jelissejew Flagge Russland 0+0+0+1 + 20,1
7 Johannes Thingnes Bö Flagge Norwegen 1+1+1+1 + 27,4
8 Erik Lesser Flagge Deutschland 0+0+0+1 + 31,4
9 Simon Desthieux Flagge Frankreich 1+1+0+1 + 31,9
10 Quentin Fillon Maillet Flagge Frankreich 2+0+0+1 + 36,4

Dammen

1 Julia Simon Flagge Frankreich 0+1+2+0 40:11,1
2 Franziska Preuß Flagge Deutschland 1+0+1+0 + 3,9
3 Hanna Öberg Flagge Schweden 1+0+1+1 + 11,7
4 Ingrid Landmark Tandrevold Flagge Norwegen 0+0+2+0 + 13,0
5 Mona Brorsson Flagge Schweden 1+0+0+0 + 14,9
6 Dorothea Wierer Flagge Italien 0+0+0+2 + 28,8
7 Marte Olsbu Röiseland Flagge Norwegen 1+1+1+1 + 30,3
8 Tiril Eckhoff Flagge Norwegen 0+1+3+0 + 32,1
9 Justine Braisaz-Bouchet Flagge Frankreich 1+0+2+1 + 32,6
10 Marketa Davidova Flagge Tschechien 0+0+1+2 + 33,0