Eng 0:2 respektiv 1:3 Néierlag gouf et fir d'Veräiner vun de Lëtzebuerger an den zwou héchste portugisesche Spillklassen.

An der zweeter portugisescher Liga huet den Eric Veiga mat Vilafranquense 0:2 bei Leixoes verluer. An der 29. Minutt hat den Nene seng Ekipp a Féierung bruecht an an der 72. huet de Kiki d'Avance ausgebaut. De Lëtzebuerger gouf an der 82. Minutt fir de Grilo agewiesselt. Vilafranquense ass aktuell 14. an der Tabell mat enger Avance vu 4 Punkten op eng Ofstigsplaz.

An der Divisioun driwwer ass et och net gutt fir d'Ekipp vum Vincent Thill gelaf. Nacional Funchal war nämlech bei Vitoria Guimaraes op Besuch. D'Gäscht haten duerch e Gol vum Gorre an der 16. Minutt gutt ugefaangen, ma Quaresma, Estupinan an e Selbstgol vum Lucas hunn de Match komplett op d'Kopp gedréint. Vun der 81. Minutt u stoung de Vincent Thill um Terrain, konnt awer senger Ekipp net méi vill hëllefen. An der Tabell ass Nacional Funchal aktuell de 14. dat mat just engem Punkt Avance op d'Ofstigsplazen.

Mëttwoch

De Laurent Jans gouf op Säite vu Léck an der 64. Minutt agewiesselt. Duerch d'4:0-Victoire vum Standard zu Mechelen huet een am belsche Championnat elo 34 Punkten um Kont an et steet een op der 5. Plaz an der Tabell.

An den 1/8-Finalle vun der Coupe a Griichenland ass et iwwerdeems den Out fir Kreta. Zu Volos huet ee mat 0:2 de Kierzere gezunn. De Vahid Selimovic souz bei Kreta déi 90 Minutten iwwer op der Bänk.

Dënschdeg

An der Bundesliga huet Mainz mam Leandro Barreiro mat 0:2 géint Wolfsburg de Kierzere gezunn. De Lëtzebuerger stoung an der Startformatioun.

Am Championnat an der Belsch huet Waasland-Beveren zu Mouscron fir de Kont vum 25. Spilldag 1:1 gläich gespillt. Den Danel Sinani souz déi 90 Minutten iwwer op der Bänk. De Veräi vum Lëtzebuerger Nationalspiller steet aktuell mat 20 Punkten op der 17. an zweetleschter Plaz an der Tabell.