An Italien hat den AS Roum bei der 4:3-Victoire géint Spezia um Enn de längeren Otem, den AC Mailand verléiert kloer mat 0:3 géint Atalanta.

Nieft der Suitte vum 18. Spilldag an der däitscher Bundesliga stoungen um Samschdeg ënnert anerem an England d'1/16-Finallen am FA Cup um Programm, wou Arsenal a Manchester City am Asaz waren.

FA Cup

Southampton 1:0 Arsenal
1:0 Gabriel (24', Selbstgol)

Fir den FC Arsenal leeft et an dëser Saison weider net no Plang. Wärend d'Londoner an der Premier League just am Mëttelmooss sinn, gouf et um Samschdeg eng 0:1-Defaite am FA Cup. Duerch ee Selbstgol vum Gabriel an der 24. Minutt war Arsenal dem Réckstand laang hannendru gelaf. Si hate wuel ee Plus u Ballbesëtz, ma och d'Lokalekipp aus Southampton hat duerch Konteren ëmmer erëm hir offensiv Aktiounen. Um Enn gouf Arsenal soumat an der 1/16-Finall vum FA Cup eliminéiert.

Cheltenham 1:3 Manchester City
1:0 May (59'), 1:1 Foden (81'), 1:2 Jesus (85'), 1:3 Torres (90'+4)

An der éischter Hallschent war Manchester City, wéi erwaart, déi dominant Ekipp. Si hate vill Ballbesëtz, ma Cheltenham aus der 4. englescher Divisioun hat defensiv gutt dogéint gehalen a sou sollt et och mat 0:0 an d'Kabinne goen. Nom Téi konnt Cheltham da fir eng fauschtdéck Iwwerraschung suergen. An der 59. Minutt konnt de May eng Virlag vum Lloyd an de Filet setzen. Duerno huet Manchester City op den Ausgläich gedréckt, ma et hat awer oft u Prezisioun gefeelt. Et hat bis zur 81. Minutt gedauert, éier den haushéije Favorit aus Manchester den Ausgläich realiséiere konnt, dëst duerch de Foden. Nëmme 4 Minutte méi spéit konnt de Jesus mat engem super Ofschloss de Match dréinen an d'Gäscht virun enger Blamage retten. Um Enn konnt den Torres an der Nospillzäit nach een drop setzen a soumat setzt sech Manchester City um Enn mat Méi duerch an ass eng Ronn weider.

Serie A

AS Roum 4:3 Spezia
1:0 Mayoral (17'), 1:1 Piccoli (24'), 2:1 Mayoral (52'), 3:1 Karsdorp (55'), 3:2 Farias (59'), 3:3 Verde (90'), 4:3 Pellegrini (90'+1)

Fir den AS Roum hat doheem géint Spezia just eng Victoire gezielt, fir weiderhin d'Chancen op eng Champions-League-Plaz ze halen. Si konnten och fréi a Féierung goen, ma nach virun der Paus war de Gäscht den Ausgläich gelongen. Nom Téi konnten d'Réimer duerch zwee Goler de Wee Richtung Victoire opmaachen, ma Spezia konnt sech op en Neits zréck an de Match kämpfen. Nodeems de Farias an der 59. Minutt den Uschloss markéiert hat, war et dem Verde an der leschter offizieller Minutt esouguer gelongen, den Ausgläich ze schéissen. Um Enn sollte si awer ouni Punkten heem fueren, dëst well de Pellegrini an der Nospillzäit den entscheedende Gol fir Roum markéiere konnt.

AC Mailand 0:3 Atalanta
0:1 Romero (26'), 0:2 Ilicic (53'), 0:3 Zapata (77')

An der italienescher Serie A hat den Tabelleleader aus Mailand Atalanta op Besuch. D'Gäscht haten déi éischt geféierlech Aktiounen am Match a sou konnte si och an der 26. Minutt a Féierung goen. No enger Flank an de Strofraum konnt sech de Romero mam Kapp duerchsetzen an Atalanta a Féierung bréngen. Déi beschte Geleeënheet op den Ausgläich virum Téi hat den Ibrahimovic an der 42. Minutt, ma säi Schoss goung awer knapp laanscht de Potto.
An der 2. Hallschent konnt Atalanta fréi erhéijen, a sou fir eng Virentscheedung suergen. No engem Feeler vum Kessie am Strofraum konnt den Ilicic aus eelef Meter mat engem prezise Schoss op 2:0 stellen. An der 77. konnt den Zapata fir d'Entscheedung suergen an dem AC Mailand seng 2. Defaite vun der Saison festegen. Den AC Mailand bleift awer de Leader am Championnat, dëst, well de Konkurrent Inter Mailand net iwwer een 0:0-Remis géint Udinese erauskomm war.

Udinese 0:0 Inter Mailand

Ligue 1

Lens 0:1 Nizza
0:1 Atal (49')

Monaco - Marseille 3:1
0:1 Radonjic (12'), 1:1 Maripan (47'), 2:1 Tchouameni (75'), 3:1 Jovetic (91')

La Liga

Sevilla 3:0 Cádiz
1:0 En-Nesyri (35'), 2:0 En-Nesyri (39'), 3:0 En-Nesyri (62')

A Spuenien bleift Sevilla duerch eng kloer 3:0-Victoire weider uewen an der Tabell dobäi. Op en Neits war de Mann vum Match den En-Nesyri, deen déi dräi Goler markéiere konnt. Sevilla konnt sech duerch dës Victoire op d'Mannst bis de Sonndeg op déi 3. Tabelleplaz verbesseren a laanscht den FC Barcelona zéien. Duerch déi 3 Goler steet den En-Nesyri elo scho bei 12 Goler an dëser Saison.

Huesca 0:0 Villareal

Real Sociedad 2:2 Betis Sevilla
1:0 Isak (48'), 2:0 Oyarzabal (57'), 2:1 Canales (86'), 2:2 Joaquin (90'+2)

Alavés - Real Madrid 1:4
0:1 Casemiro (15'), 0:2 Benzema (41'), 0:3 Hazard (45+1), 1:3 Joselu (59'), 1:4 Benzema (70')