Iwwerdeems kënne sech an der Bundesliga Bayern an Hoffenheim 3 Punkte sécheren. Lazio Roum klappt Sassuolo a Barcelona gewënnt géint Elche.

An England gëtt dëse Weekend am FA Cup gespillt. An deenen aneren europäesche Championnater ass et d'Suite an deene jeeweilege Championnater.

Bundesliga

Schalke 04 - Bayern München 0:4
0:1 Müller (33'), 0:2 Lewandowski (54'), 0:3 Müller (88'), 0:4 Alaba (90')

Béid Ekippen haten an der Ufanksphas hir Chancen, e Gol sollt awer net falen. An der 11. Minutt war op Säite vu Schalke de Mark Uth, deen déi beschte Chance fir d'Knappen hat, mee de Manuel Neuer huet mat engem super Reflex dem Uth säi Kappball aus 5 Meter konnten entschäerfen. No 33. Minutten huet Bayern dunn den net ganz onverdéngten 1:0 duerch den Thomas Müller geschoss an ass mat engem Gol Virsprong an d’Kabinne gaangen. Nom Téi hat Schalke duerch e Kappball vum Nastasic d'Chance op den Ausgläich, de Ball sollt awer knapps laanscht de Potto goen. Nëmmen 2 Minutte méi spéit huet de Lewandowski mat sengem 23. Gol an dëser Saison den 2:0 fir d'Gäscht markéiert. Bis déi leschte Minutten ass an der Veltins Arena net méi vill passéiert, éier de Müller an den Alaba de Sack zougemaach hunn.

TSG Hoffenheim - 1. FC Köln 3:0
1:0 Kramaric (7'), 2:0 Baumgartner (28'), 3:0 Kramaric (75')

An der Paus louch d’TSG mat 2:0 a Féierung, ouni awer wierklech ze glänzen. No 6 Minutte krut d’TSG een Handelefmeter zougesprach, deen de Kramaric ouni Problemer an de Filet setze konnt. De Baumgartner konnt mat engem schéine Gol no Viraarbecht vum Gacinovic de Score an der 28. Minutt op 2:0 erhéijen. Kuerz virun der Paus war d'Gléck net op der Kölner Säit, ass dem Wolf säi Schoss just op de Potto gaangen.

No der Paus war Köln weiderhi beméit, mee et huet am Offensivspill un der néideger Prezisioun a Konzentratioun gefeelt. 15 Minutte virum Enn huet de Kramaric no Foul vum Modeste um Baumgartner de fällegen Eelefmeter fir d'Virentscheedung genotzt. Zu allem Iwwerfloss huet de Modeste 4 Minutte méi spéit och nach een eegenen Eelefmeter fir Köln verschoss, sou dass Geißböcke zu Hoffenheim 0:3 verléieren a weider am Tabellekeller hänke bleiwen.

FA Cup

Manchester United - FC Liverpool 3:2
0:1 Salah (18'), 1:1 Greenwood (26'), 2:1 Rashford (48'), 2:2 Salah (58'), 3:2 Fernandes (78')

Déi éischt Véierelsstonn hat Liverpool wuel méi Ballbesëtz, mee Manchester huet ëmmer erëm geféierlech gekontert, an hat duerch Pogba a Cavani zwou gutt Aktioune virum Gol vun de Reds. An der 18. Minutt huet den aktuelle Champion dunn awer a Persoun vum Salah, deen de Ball iwwert den de Gea gelüpft huet, äiskal zougeschloen. Nëmmen 8 Minutte méi spéit hunn d'Red Devils no engem Zockerpass vum Rashford op de Greenwood de Score erëm ausgeglach, sou dass et no 26 Minutten 1:1 stoung, wat och gläichzäiteg d'Resultat an der Hallschent war.

Nom Téi goufen d'Reds kal erwëscht. Ballverloscht am Mëttelfeld an esou huet de Rashford no Zouspill vum Cavani de Ball zu 2:1 Féierung an de Filet gesat.  Nom Ausgläich an der 58. Minutt vum Salah louch de Momentum erëm bei de Reds. Béid Ekippen hunn een immens intensiven a flotte Match gewisen, an de Wee no vir gesicht. An d'Verlängerung wollt kee goen. No engem Foul vum Fabinho un de Cavani ass et dunn zu engem Fräistouss ronn 17 Meter virum Gol fir Manu komm. Dësen huet de Fernandes no engem herrleche Schoss an de laangen Eck gesat, an den 3:2 fir d'Lokalekipp geschoss. Si sollten de Virsprong dann och iwwert Zäit bréngen, sou dass Manu no engem spannende Match an déi nächste Ronn anzitt.

FC Chelsea - Luton Town 3:1
1:0 Abraham (11'), 2:0 Abraham (17'), 2:1 Clark (30'), 3:1 Abraham (74')

Chelsea huet sech duerch een Hattrick vum Abraham géint den Zweetligist Luton Town um Enn mat 3:1 konnten duerchsetzen a steet domat an der 1/8-Finall vum FA Cup. Luton hat an de 60. Minutt duerch de Cornick bal den 2:2-Ausgläich geschoss, de Kepa am Gol vu Chelsea sollt awer a leschter Sekonn fir d'Blues de Ball ofwieren. 5 Minutte virum Schluss hätt den Timo Werner nach op 4:1 kéinten erhéijen, mee säin Eelefmeter sollt de Wee an de Gol net fannen.

FC Brentford - Leicester City 1:3
1:0 Bech (6'), 1:1 Under (46'), 1:2 Tielemans (51'), 1:3 Maddison (71')

No 6 Minutten huet de Bech Sörensen d'Ekipp aus der Championschip, der 2. Liga a England, no engem Corner iwwerraschend mat 1:0 a Féierung geschoss. Mat dësem Resultat sollt et och an d'Paus goen a Brentford konnt vun der Iwwerraschung dreemen. No der Paus sollt de Favorit dunn de Spiiss awer ëmdréinen. Keng Minutt huet et gedauert, do huet den Under den Ausgläich markéiert. Tielemans a Maddison hunn am Laf vum Match den Deckel drop gemaach, sou dass Leicester wéi och Chelsea an der 1/8-Finall am FA Cup stinn.

Serie A

Juventus Turin - FC Bologna 2:0
1:0 Arthur (15'), 2:0 McKennie (71')

Nodeems Inter Mailand an den AC Mailand um Samschdeg Punkte leie gelooss huet, konnt sech Juventus géint Bologna duerch Goler vun Arthur a McKennie 3 ganz wichteg Punkte sécheren. Bologna, aktuell op der 13. Plaz an der Tabell, huet zu Turin wuel eng ganz couragéiert Leeschtung gewisen, ass allen a allem awer ouni Gléck virum Gol vum Szczesny bliwwen.
 
Hellas Verona - SSC Neapel 3:1
0:1 Lozano (1'), 1:1 Dimarco (34'), 2:1 Barak (62'), 3:1 Zaccagni (79')

Lazio Roum - Sassuolo 2:1
0:1 Caputo (6'), 1:1 Milinkovic-Savic (25'), 2:1 Immobile (71')

D'Lokalekipp huet virun allem an der Offensiv vill méi fir d'Spill gemaach an hat och eng helle Wull u Chancen, déi Correa a Co. laang net notze konnten. An der 71. Minutt huet den Immobile dunn den erléisende Gol fir d'Lokalekipp markéiert. De 2:1 sollt dann och d'Schlussresultat sinn.

Ligue 1

FC Metz - FC Nantes 2:0
1:0 Leya (35'), 2:0 Boulaya (90+4')

Metz kann eng weider Victoire feieren a verbessert sech nom 2:0 géint Nantes op déi 8 Plaz an der Ligue 1. De Resumé vum Match kënnt Dir bei de Kolleege vu RTL 5minutes liesen.

Stade Rennes - OSC Lille 0:1 
0:1 David (16')

Am Spëtzematch vun der Ligue 1 ass de Gäscht 1 Gol duergaangen, fir déi 90 Minutte géint Stade Rennes kënne fir sech ze entscheeden. Domat ass Lille no 21. Spilldeeg punktgläich mat PSG a steet op der 2. Plaz an der Ligue 1.

La Liga

FC Elche - FC Barcelona 0:2
0:1 de Jong (39'), 0:2 Puig (89')

Barcelona ass wuel mat engem 1:0 Virsprong an d'Paus gaangen, eng grouss Chance konnten d'Katalane sech awer net erausspillen, sou dass d'Féierung éischter schmeechelhaft war. Ouni de Lionel Messi, deen aktuell wéinst enger rouder Kaart gespaart ass, ass de Gäscht an der Offensiv relativ wéineg agefall. An der 56. Minutt hat Elche duerch de Rigoni déi grouss Chance op den 1:1, mee den Ter Stegen sollt de Schoss paréieren. Dono ass vun der Lokalekipp net méi vill komm, sou dass den agewiesselte Puig fir kuerz viru Schluss fir den 2:0 a gläichzäiteg fir d'Schlussresultat gesuergt huet.