En Donneschdeg den Owend war mam Mika Pinot ee Lëtzebuerger Futtballer-Nationalspiller am Ausland am Asaz.

Am hollännesche Championnat hunn um 19. Spilldag Sparta Rotterdam an Twente Enschede mat engem 0:0 d'Punkte gedeelt. De Mica Pinto stoung bei den Haushären an der Startformatioun an huet de ganze Match als Lénksverteideger duerchgespillt.

Sparta läit an der Tabell mat 22 Punkten op der 10. Plaz.

Mëttwoch

E Mëttwoch den Owend stoung de Maurice Deville fir d'éischte Kéier zanter dem 24. November nees ënnert den éischten Eelef vum FC Saarbrécken an der 3. Liga. De Lëtzebuerger Nationalspiller gouf bei der 2:4-Néierlag zu Rostock an der 65. Minutt ausgewiesselt. An der Tabell steet Saarbrécken aktuell op der 7. Plaz, dat mat engem Retard vu 5 Punkten op d'Relegatiounsplaz.

An der 2. Bundesliga huet Karlsruhe ouni de blesséierten Dirk Carlson mat 1:0 géint Hannover gewonnen. An der Tabell steet de KSC op der 6. Plaz an huet e Retard vu 4 Punkten op Kiel, déi aktuell déi Drëtt sinn.

Dënschdeg

Den 1. FC Kaiserslautern krut en Dënschdeg den Owend Besuch vun Türkgücü München. Um Enn ass de Match mat engem 0:0 op en Enn gaangen, domat spréngt ee Punkt fir d'Ekipp vum Lëtzebuerger Trainer Jeff Saibene eraus.

Fir Waasland-Beveren gouf et iwwerdeems eng 2:3-Néierlag en Dënschdeg géint Mechelen. Den Danel Sinani gouf an der 70. Minutt agewiesselt.

Keng gutt Nouvelle fir den Dirk Carlson. Den 22 Joer ale Lëtzebuerger Futtballnationalspiller huet een Ermiddungsbroch um ënneschten Deel vum Réck.

De Profi vu Karlsruhe aus der 2. däitscher Bundesliga fält op d'mannst 5 Wochen aus. Deemno wéi et ass, kann den Dirk Carlson duerno nees lues ufänke mat lafen. Domat dierft et fir de Lénksverteideger och relativ knapp ginn, fir am Mäerz beim Optakt vun der Weltmeeschterschaftsqualifikatioun nees fit ze sinn.

An den Intermezzo vum Tim Hall bei Wisla Krakau war ganz kuerz. No ganzer 11 Deeg gouf de Kontrakt tëscht dem polnesche Veräin an dem 23 Joer ale Lëtzebuerger Nationalspiller nees opgeléist. Den Trainer Peter Hyballa war net mam Fitnesszoustand vum Tim Hall zefridden, deen allerdéngs am Hierscht de Covid ferm erwëscht hat. No den Dissonanzen tëscht Trainer a Spiller war an enger éischter Phas just dovu riets, den Hall ze verléinen.

Eisen Informatioune no kënnt den FLF-Nationalspiller elo emol nees zeréck op Lëtzebuerg. An da kéint et sinn, datt den Zentralverteideger, bis hien en neie Proficlub fonnt huet, bei sengem leschte Veräin hei am Land, dem Progrès Nidderkuer géif mat trainéieren.

Méindeg

Um 15. Spilldag an der héchster Divisioun a Portugal huet Nacional Funchal sech ee Punkt bei Benfica geséchert. Zu Lissabon hu sech béid Ekippe mat engem 1:1 getrennt. De Vincent Thill stoung bei Nacional Funchal an den éischten Eelef, gouf awer an der 59. Minutt ausgewiesselt. An der Tabell steet Nacional op der 14. Plaz a Benfica ass Zweeten.

Casa Pia huet iwwerdeems an der zweeter Divisioun a Portugal déi sechste Victoire an dëser Saison gefeiert. Bei der 2:1-Victoire géint Cova da Piedade huet de Marvin Martins déi komplett Partie gespillt. An der 64. Minutt huet de Lëtzebuerger Nationalspiller déi giel Kaart gesinn.