Et ass en éischte groussen Héichpunkt vum Lëtzebuerger Sportskalenner, de Liichtathleetik Indoor Meeting e Samschdeg an der Coque.

"Ech wëll de Concours och dëst Joer nees gewannen", dat sot de Bommstousser Bob Bertemes am Virfeld vum Internationale Liichtathleetik Meeting an der Coque. Donieft moosst sech awer och de Charel Grethen, deen an de leschte Wochen de Lëtzebuerger Rekord iwwer 1.500 Meter direkt zwee Mol verbessert huet, mat der internationaler Konkurrenz.

De Lëtzebuerger Sportler vum Joer an de Mëttelstreckeleefer si sécherlech aus Lëtzebuerger Siicht d'Tête d'Affiche vun dësem Meeting. Et kënnt net esou dacks am Joer vir, datt de Bob Bertemes, dee sech op absoluttem Weltniveau beweegt, hei am Land am Asaz ass:

Absolut sinn ech frou, fir e Meeting hei zu Lëtzebuerg ze maachen. Dëst Joer ass jo speziell an dofir wäerte net esou Meeting zu Lëtzebuerg sinn. D'lescht Joer konnt sech de 27 Joer ale Bommstousser an der Coque schonn duerchsetzen. Dat soll och dës Kéier de Fall sinn:

Natierlech wär et cool déi 1. Plaz ze verdeedegen. D'Konkurrenz ass awer esou gutt wéi nach ni. Mat mengem Trainer hu mer ofgemaach, sech op d'Technik ze konzentréieren.

An der Hal huet de Bob Bertemes de Lëtzebuerger Rekord mat 21 Meter 03. Dobaussen esouguer mat 22 Meter 22. A Propos nationale Rekord: Iwwer 1.500 Meter huet de Charel Grethen säin eegene Rekord schonn direkt zwee Mol an de leschte Woche verbessert an dat no senger laanger Blessure un der Achillesseen. E Samschdeg ass et da jo den Optrëtt an der Arena vun der Coque.

Et ass scho super, hei ze lafen, wou ech ëmmer trainéieren. Zil ass virun allem eng gutt Course ze hunn an ëm d'Victoire matzelafen.

Bei den Damme probéiere sech d'Vera Hoffmann iwwer 1.500 Meter an d'Patrizia van der Weken iwwer 60 Meter fir d'Indoor-Europameeschterschaft ze qualifizéieren, déi Ufank Mäerz zu Torun a Polen ass.

Maximal 87 Athleten si beim Meeting ageschriwwen, Spectateure si keng erlaabt. All d'Sportler, Trainer, Jugen, Journalisten a sou weider hu missen negativ op de Covid getest sinn.

De Meeting fänkt um 13.35 Auer un an gëtt live op RTL.lu gestreamt.