En Donneschdeg den Owend goufen an der Europa League d'Allersmatcher vun de 1/16-Finalle gespillt.

En Donneschdeg um 16 Auer stoung schonn deen éischte Match vun de 1/16-Finallen an der Europa League um Programm. Géintiwwer stounge sech hei Dynamo Kiew an den FC Bruges. Um Enn gouf et kee Gewënner am Allersmatch. Béid Ekippen hu sech mat engem 1:1-Remis getrennt. De Lëtzebuerger Nationalspiller Gerson Rodrigues souz bei Dynamo Kiew am Ufank vum Match op der Bänk. An der 72. Minutt ass hien agewiesselt ginn.

D'Young Boys Bern hunn da mat 4:3 iwwerraschend géint Leverkusen gewonnen. Nodeems d'Ekipp aus der Schwäiz, bei där de Christopher Martins spillt, schonn no 45 Minutte mat 3:0 vir louch hat Leverkusen no der Paus op 3:3 ausgeglach. Bern ass an der 89. Minutt duerch de Siebatcheu awer nach den decisive Gol gelongen. De Martins huet wéinst enger Blessure bei de Young Boys gefeelt.

Déi erwaarte Victoire gouf et fir Manchester United. D'Ekipp aus England huet sech mat 4:0 bei Real Sociedad behaapt. D'Goler hunn de Fernandes (27', 57'), de Rashford (65') an den James (90') geschoss.

Kee Gewënner gouf et an der Partie tëscht Benfica an Arsenal. Béid Ekippen hu sech mat engem 1:1-Remis getrennt.

Lille huet sech iwwerdeems misse mat 1:2 géint Ajax Amsterdam geschloe ginn. De Leader aus der Ligue 1 hat laang nom Gewënner ausgesinn. Ma Ajax konnt an de leschte Minutten nach de Match dréinen, dat no Goler vum Tadic (87', Eelefmeter) an dem Brobbey (89').

Den nächsten Donneschdeg ginn d'Retourmatcher vun de 1/16-Finalle an der Europa League gespillt.

Déi komplett Resultater